Amérika tashqi ishlar ministirliqi Uyghur rayonigha baridighan amérika puqralirini agahlandurdi

Muxbirimiz erkin
2019-04-01
Élxet
Pikir
Share
Print

Amérika tashqi ishlar ministirliqi 29‏-mart küni radiyomizgha mexsus yazma bayanat bérip, Uyghur rayonigha baridighan amérika puqralirini mezkur rayondiki pewqul'adde bixeterlik tedbirliridin hezer eyleshke agahlandurghan.

Bayanatta tekitlinishiche, amérika tashqi ishlar ministirliqi amérika girazhdani bolghan herqandaq kishini xitaygha barmaqchi bolsa amérika pasportigha qanunluq xitay wizisi qoydurup, xitaygha kirishke chaqiridiken.

Amérika tashqi ishlar ministirliqining mezkur bayanati muxbirimizning amérikida tughulghan bir Uyghur balining anisi bilen 2017‏-yili 3‏-ayda xitaygha qaytip, ghuljada tosulup qalghanliqigha da'ir so'alimizgha qarita bergen jawabida tekitlen'gen.

Bayanatta mundaq déyilgen: "Amérika xitayning shinjangdiki Uyghur, qazaq we bashqa musulman az sanliq guruppilargha qarita élip bériwatqan qattiq basturush herikitidin, jümlidin ularni keng kölemlik yighiwélish lagérlirigha qamash, yuqiri téxnikiliq teqiblesh, xitay kadirlirini Uyghur a'ililerge orunlashturush, medeniyet we diniy kimlikini ipadileshni kontrol qilish, chet'eldikilerni mejburiy xitaygha qayturup kétish qilmishliridin chongqur endishe qilidu".

Bayanatta yene, amérikaning chet'eldiki amérika girazhdanlirigha éhtiyajliq konsulluq yardimi bérishke teyyar ikenliki, lékin xitayning qosh girazhdanliqini étirap qilmaydighanliqini eskertip, "Bu dégenlik xitay bezi hadisilerde amérika elchixanisining konsulluq mulazimiti bilen teminlishini tosushi, shuningdek amérika-xitay qosh girazhdanlirigha we xitaygha baghlinishliq amérika girazhdanlirigha téximu shundaq mu'amile qilishi we parakendichilik sélishi mumkin. Shunga, amérika girazhdanlirining xitaygha amérika pasporti bilen inawetlik xitay wizisi qoydurup kirishini tewsiye qilimiz" déyilgen.

Bayanatta eskertilishiche, amérika tashqi ishlar ministirliqi herqandaq bir amérika girazhdanining Uyghur rayonidiki lagérlarda tutup turuluwatqanliqini delilliyelmigen. Buni aldi bilen amérika simliq xewerler tori CNN tashqi ishlar ministirliqidiki uchur menbelirining sözini neqil keltürüp, amérika girazhdani yaki yéshil kartiliq "Bir qanche" kishining Uyghur rayonidiki lagérlarda tutup turuluwatqan bolushi mumkinlikini ilgiri sürgen idi.

Toluq bet