Amérika tashqi ishlar ministirliqi xitayni Uyghur irqiy qirghinchiliqi we insaniyetke qarshi jinayetni toxtitishqa chaqirdi

Amérika tashqi ishlar ministirliqining démokratiye, kishilik hoquq we emgek bashqarmisi 18-mart chaqiriq élan qilip, 2019-yili xitay da'iriliri teripidin 20 yilliq qamaq jazasigha höküm qilin'ghan doxtur gülshen abbasning qoyup bérilishini telep qilish bilen bir waqitta, Uyghurlargha qarita dawamlishiwatqan irqiy qirghinchiliq we insaniyetke qarshi jinayetni toxtitishqa chaqirghan.

Bu pirézidént tramp hökümiti bu yil 1-ayda wezipisige olturghandin béri, amérika tashqi ishlar ministirliqining yene bir qétim Uyghurlargha qaritilghan irqiy qirghinchiliq we insaniyetke qarshi jinayetning dawamlishiwatqanliqini qayta tekitlishidur. Buning aldida, yeni ötken hepte, amérika tashqi ishlar tashqi ishlar ministiri marko rubiyo, Uyghurlarni xitaygha qayturushta jawabkarliqi bolghan tayland da'irilirige we bashqa chet el hökümet emeldarlirigha wiza émbargosi qoyghanliqini élan qilghandimu, Uyghur we bashqa musulman guruppilargha qaritilghan irqiy qirghinchiliq hem insaniyetke qarshi jinayetning dawamlishiwatqanliqini bildürgen idi.

Amérika tashqi ishlar ministirliqi démokratiye, kishilik hoquq we emgek bashqarmisining X ta élan qilin'ghan chaqiriqida mundaq déyilgen: “Uyghur doxtur gülshen abbas 2019-yili mexpiy sotta 20 yilliq qamaqqa höküm qilindi, u bügün'giche tutup turulmaqta. Xitay kompartiyesi gülshen abbasni asassiz eyibleshler bilen tutqun qilghan, bu uning amérika puqrasi bolghan a'ilisini jimiqturush yolidiki chégra halqighan basturush herikitidur”.

Bayanatta yene mundaq déyilgen: “Xitay kompartiyesi Uyghurlargha qarshi dawamlashturuwatqan irqiy qirghinchiliq we insaniyetke qarshi jinayetni, shuningdek zorluq we qorqutush arqiliq, amérikaliqlarni jimiqturush urunushlirini toxtitishi shert”.

Melum bolushiche, gülshen abbas ürümchidiki Uyghur aptonom rayonluq 2-doxturxanining pénsiyege chiqqan doxturi bolup, u 2018-yili 9-ayda tutup kétilgen. Uning amérikadiki a'ile ezaliri 2020-yili 12-ayda, gülshen abbasning “Térrorluq teshkilatigha qatnishish”, “Térrorluq pa'aliyetlerge yardem bérish”, “Ijtima'iy tertipke buzghunchiliq qilish” qatarliq “Jinayet” ler bilen eyiblinip, 2019-yili 3-ayda 20 yilliq késiwétilgenlikidin xewer tapqan.