Американиң тәвәккүл мәблиғи ширкәтлириниң хитай ширкәтлиригә мәбләғ селишиниң уйғур қирғинчилиқидики роли қайта тәкитләнди

Америка дөләт мәҗлиси қармиқидики “америка-хитай риқабити алаһидә комитети” хитай һөкүмитиниң уйғурларға йүргүзүватқан ирқий қирғинчилиқиға ортақ болуп кәлгән хитай ширкәтлиригә мәбләғ селиватқан америка ширкәтлирини тәнқидлигән.

“америка-хитай риқабити алаһидә комитети” X тики һесабида елан қилған учурида, “өткән 20 йил мабәйнидә американиң тәвәккүл мәблиғи ширкәтлири хитай компартийәсиниң уйғурларға ирқий қирғинчилиқ йүргүзүшигә шараит яритип бәргән хитай ширкәтлиригә нәччә йүз милйон мәбләғ салди” дейилгән.

Мәзкур комитетниң билдүрүшичә, секуая капитал, валдин хәлқара ширкити, куалкам һәссидарлиқ ширкити, GSR һәссидарлиқ ширкити, GGV капитал қатарлиқ ширкәтләр хитайниң уйғурларни кәң көләмдә назарәт қилишиға ярдәм қилған сүний әқилни тәрәққий қилдуруш ширкити Megvii, чирай тонуш техникисини тәрәққий қилдурған һәмдә уйғур елидики сақчи органлири билән һәмкарлашқан SenseTime, DeepGlint қатарлиқ хитай ширкәтлиригә мәбләғ салған.

Бу йилниң бешида, “америка-хитай риқабити алаһидә комитети” көп йиллардин буян хитай армийәсини тәрәққий қилдуруш вә уйғурларни бастурушқа четишлиқ хитай ширкәтлиригә мәбләғ селиватқан америкалиқ тәвәккүл мәблиғи ширкәтлири һәққидә 68 бәтлик бир доклат елан қилғаниди. Доклатта улар, американиң 5 тәвәккүл мәблиғи ширкитиниң хитайниң ирқий қирғинчилиқи вә башқа кишилик һоқуқ дәпсәндичиликигә ярдәм бериватқан юқири техника ширкәтлиригә аз дегәндә 3 милярд доллар мәбләғ салғанлиқини билдүргән.

Америка дөләт мәҗлисниң бу мәсилини көтүрүп чиқиши нәтиҗисидә, американиң мәблиғини американиң мәнпәәтигә зиян селиш үчүн тиришиватқан хитай ширкәтлиригә, болупму хитайниң дөләт һамийлиқидики ширкәтләргә салмаслиқ һәққидә нурғун муназириләр қозғалған вә бир қисим ширкәтләр хитай базиридин чекинишкә башлиғаниди.