Америка җасуслуқ гумани билән хитай тәтқиқатчилириға виза чәклимиси қоюшни күчәйтти

Мухбиримиз әркин
2019-04-15
Елхәт
Пикир
Share
Принт

Америка федератсийә тәкшүрүш идариси (FBI) хитайниң америкадики җасуслуқ һәрикәтлиригә қарши тәдбирлирини җиддийләштүрүп, хитай истихбаратиға бағлинишлиқ дәп гуман қилған хитай тәтқиқатчилириға қарита виза чәклимисини күчәйткән.

«Ню-йорк вақти гезити» ниң ашкарилишичә, федератсийә тәкшүрүш идариси 2018‏-йили 30 дәк хитай иҗтимаий пән профессори, илмий тәтқиқат институтиниң мәсуллири вә мутәхәссислириниң америка визисини бикар қилған яки тоңлатқан. Визиси бикар қилинған бу шәхсләрниң ичидә хитай иҗтимаий пәнләр академийәси америка тәтқиқат институтиниң директори ву бәййи, бейҗиң чоңяң малийә тәтқиқат институтиниң башлиқи ваң вен, нәнҗиң университети җәнубий деңиз институтиниң башлиқи җу фең қатарлиқ шәхсләр бар икән. Америка федератсийә тәкшүрүш идариси бу кишиләрниң хитай һәрбий тармақлири, ташқи ишлар министирлиқи яки хитай бихәтәрлик органлири билән алақиси, бар, дегән сәвәб билән уларниң визисини әткәс қилған.

Америка федератсийә тәкшүрүш идарисиниң башлиқи кристофер рей өткән йили 2‏-айда америка дөләт мәҗлисидә гуваһлиқ берип, хитайниң америкадики тәтқиқатчи вә оқуғучилирини җасуслуққа селиватқанлиқи, униң «пүткүл америка җәмийити үчүн тәһдиткә айланғанлиқи», буниңға «пүтүн җәмийәтниң бирдәк инкас қайтуруши керәк» ликини тәкитлигән иди.

«Ню-йорк вақти гезити» ниң илгири сүрүшичә, америка йеқинқи 40 йил мабәйнидә хитай тәтқиқатчилириға америка қиммәт өлчимини қобул қилиду, дегән үмид билән ишикини кәң ечивәткән болсиму, лекин һазир бу икки дөләт истратегийәлик рәқибләргә айланған. Америка ташқи ишлар министирлиқиниң бир әмәлдари «ню-йорк вақти гезити» гә бәргән язма баянатида, америка қанун тармақлири хитай истихбарат органлириниң зиярәтчи хитай илмий хадимлирини көпләп ишқа селип, америка пуқралириниң истихбарат учурини яғмақта, дәп қарайдиғанлиқини билдүргән.

Пикирләр (0)
Share
Толуқ бәт