Amérika jasusluq gumani bilen xitay tetqiqatchilirigha wiza cheklimisi qoyushni kücheytti

Muxbirimiz erkin
2019-04-15
Élxet
Pikir
Share
Print

Amérika fédératsiye tekshürüsh idarisi (FBI) xitayning amérikadiki jasusluq heriketlirige qarshi tedbirlirini jiddiyleshtürüp, xitay istixbaratigha baghlinishliq dep guman qilghan xitay tetqiqatchilirigha qarita wiza cheklimisini kücheytken.

"Nyu-york waqti géziti" ning ashkarilishiche, fédératsiye tekshürüsh idarisi 2018‏-yili 30 dek xitay ijtima'iy pen proféssori, ilmiy tetqiqat institutining mes'ulliri we mutexessislirining amérika wizisini bikar qilghan yaki tonglatqan. Wizisi bikar qilin'ghan bu shexslerning ichide xitay ijtima'iy penler akadémiyesi amérika tetqiqat institutining diréktori wu beyyi, béyjing chongyang maliye tetqiqat institutining bashliqi wang wén, nenjing uniwérsitéti jenubiy déngiz institutining bashliqi ju féng qatarliq shexsler bar iken. Amérika fédératsiye tekshürüsh idarisi bu kishilerning xitay herbiy tarmaqliri, tashqi ishlar ministirliqi yaki xitay bixeterlik organliri bilen alaqisi, bar, dégen seweb bilen ularning wizisini etkes qilghan.

Amérika fédératsiye tekshürüsh idarisining bashliqi kristofér réy ötken yili 2‏-ayda amérika dölet mejliside guwahliq bérip, xitayning amérikadiki tetqiqatchi we oqughuchilirini jasusluqqa séliwatqanliqi, uning "Pütkül amérika jem'iyiti üchün tehditke aylan'ghanliqi", buninggha "Pütün jem'iyetning birdek inkas qayturushi kérek" likini tekitligen idi.

"Nyu-york waqti géziti" ning ilgiri sürüshiche, amérika yéqinqi 40 yil mabeynide xitay tetqiqatchilirigha amérika qimmet ölchimini qobul qilidu, dégen ümid bilen ishikini keng échiwetken bolsimu, lékin hazir bu ikki dölet istratégiyelik reqiblerge aylan'ghan. Amérika tashqi ishlar ministirliqining bir emeldari "Nyu-york waqti géziti" ge bergen yazma bayanatida, amérika qanun tarmaqliri xitay istixbarat organlirining ziyaretchi xitay ilmiy xadimlirini köplep ishqa sélip, amérika puqralirining istixbarat uchurini yaghmaqta, dep qaraydighanliqini bildürgen.

Toluq bet