Америка авам палата әзаси микаул, җон кәррини американиң енергийә еһтияҗини “ирқий қирғинчи һакимийәт” кә бағлап қоймаслиққа чақирди

Америка авам палатасиниң әзаси, авам палата ташқи ишлар комитетиниң җумһурийәтчи баш әзаси майкел микаул 31-авғуст күни язма баянат елан қилип, президент байденниң һава килимати алаһидә вәкили җон кәррини американиң енергийә еһтияҗини хитайдәк уйғурларға ирқий қирғинчилиқ қилған бир һакимийәткә башлап қоймаслиққа чақирған. Микаулниң баянати җон кәрри 31-авғуст хитай зияритини башлиған күни елан қилинған.

Микаул, җон кәрриниң илгири авам палатаси ташқи ишлар комитетиға хитайниң қуяш енергийә тахтиси тәминат зәнҗиридә мәҗбурий әмгәкни ишлитидиғанлиқини ейтқанлиқи, байден һөкүмитиниңму бу һәқтики доклатида хитайниң адаләтсиз сода арқилиқ йешил енергийәни өз ‍ичигә алған тәминат зәнҗирини қандақ контрол қиливатқанлиқи тәпсилий баян қилинғанлиқини билдүргән.

У мундақ дегән: “килимат мәсилисидики әндишиләрни һәл қилиш һәрикитиниң мәҗбурий әмгәккә пайдилиқ болушиға, бизниң енергийә еһтияҗимизни шундақла тәминат зәнҗиримизни хитай хәлқ җумһурийитигә бағлап қоюшқа яки алаһидә вәкил кәрриниң хәлқара келишимләргә әмәл қилмаслиқ кәчмиши болған ирқий қирғинчи һакимийәтниң сөзигә ишинип кетишигә болмайду”.

Майкел микаулниң ейтишичә, америка өзиниң “қиммәт қаришини қурбан қилмаслиқи шундақла хитай компартийәсиниң вәдисидә турмайдиған хатирисини унтуп қалмаслиқи керәк” икән. Җон кәрри хитайға қилған бу қетимқи зияритидә хитайниң һава килимати ишлири алаһидә вәкили шйе җенхуа билән тйәнҗиндә сөзлишидикән.