Amérika awam palata ezasi mika'ul, jon kerrini amérikaning énérgiye éhtiyajini “Irqiy qirghinchi hakimiyet” ke baghlap qoymasliqqa chaqirdi

Amérika awam palatasining ezasi, awam palata tashqi ishlar komitétining jumhuriyetchi bash ezasi maykél mika'ul 31-awghust küni yazma bayanat élan qilip, prézidént baydénning hawa kilimati alahide wekili jon kerrini amérikaning énérgiye éhtiyajini xitaydek Uyghurlargha irqiy qirghinchiliq qilghan bir hakimiyetke bashlap qoymasliqqa chaqirghan. Mika'ulning bayanati jon kerri 31-awghust xitay ziyaritini bashlighan küni élan qilin'ghan.

Mika'ul, jon kerrining ilgiri awam palatasi tashqi ishlar komitétigha xitayning quyash énérgiye taxtisi teminat zenjiride mejburiy emgekni ishlitidighanliqini éytqanliqi, baydén hökümitiningmu bu heqtiki doklatida xitayning adaletsiz soda arqiliq yéshil énérgiyeni öz ‍ichige alghan teminat zenjirini qandaq kontrol qiliwatqanliqi tepsiliy bayan qilin'ghanliqini bildürgen.

U mundaq dégen: “Kilimat mesilisidiki endishilerni hel qilish herikitining mejburiy emgekke paydiliq bolushigha, bizning énérgiye éhtiyajimizni shundaqla teminat zenjirimizni xitay xelq jumhuriyitige baghlap qoyushqa yaki alahide wekil kerrining xelq'ara kélishimlerge emel qilmasliq kechmishi bolghan irqiy qirghinchi hakimiyetning sözige ishinip kétishige bolmaydu”.

Maykél mika'ulning éytishiche, amérika özining “Qimmet qarishini qurban qilmasliqi shundaqla xitay kompartiyesining wediside turmaydighan xatirisini untup qalmasliqi kérek” iken. Jon kerri xitaygha qilghan bu qétimqi ziyaritide xitayning hawa kilimati ishliri alahide wekili shyé jénxu'a bilen tyenjinde sözlishidiken.