Америка-хитай арисида таҗсиман вирус аталғуси һәққидә йеңи бир күрәш башланди

Мухбиримиз ирадә
2020-03-18
Елхәт
Пикир
Share
Принт

Хитай охшимиған йоллар арқилиқ америкаға «таҗсиман вирусниң мәнбәси» дәп төһмәт қилғандин кейин америка рәһбәрлири мәзкур вирусни «вухән вируси» вә «хитай вируси» дәп аташ арқилиқ хитайниң төһмитигә җаваб қайтурди.

17-Март күни америка президенти доналд трамп тивиттирда учур йоллап «хитай вирусиниң тәсиригә учриған америка ширкәтлиригә зор күч билән ярдәм беримиз,» дегәндин кейин америкадики бир қисим орун вә шәхсләр президент трампни «ирқчилиқ қилди, бу америка-хитай мунасивәтлиригә зиянлиқ» дәп тәнқид қилғаниди.

Бирақ у шу күн ахшам мухбирларниң бу һәқтики соалиға җаваб бәргәндә «америка-хитай мунасивәтлиригә зиян бериватқан мән әмәс, әксичә вирусни америкаға артмақчи болған хитайдур» дәп җаваб бәрди.

Шу күни ахшам йәнә америка ташқи ишлар министирлиқиму өзиниң язма баянатлиридиму «корона вируси» ниң орниға «вухән вируси» дегән сөзни рәсмий ишлитишкә башлиди. Майк помпейо буниңдин илгирирәк «вухән вируси» дегән сөзни ишләткән.

Йеқинда хитай ташқи ишлар министирлиқиниң баянатчиси җав лиҗйән тивиттирда учур йоллап: «таҗсиман вирусни 2019-йили вухән шәһиридики һәрбийләр тәнтәрбийә мусабиқисигә қатнишишқа кәлгән америка әскәрлири вухәнгә тарқитиветип қайтип кәткән» дегәндин кейин хәлқарада қаттиқ әйибләшкә дуч кәлгән. Америка ташқи ишлар министирлиқи бу мунасивәт билән хитайниң америкадики баш әлчиси сүй тйәнкәйни чақиртип, униңға кәскин ибариләр билән йезилған наразилиқ нотиси тапшурған иди. Шундин буян америкада вухәндин тарқалған бу вирусни «хитай вируси» яки «вухән вируси» дәп аташ һәққидә күчлүк муназирә қозғалди.

Пикирләр (0)
Share
Толуқ бәт