Америка малийә министири җәнет йелен хитайға йетип барған

Вашингтондин мухбиримиз ирадә тәйярлиди
2024.04.04

Америка малийә министири җәнет йелен хитайда 5 күнлүк рәсмий зиярәттә болидикән. Бирләшмә агентлиқиниң хәвәр қилишичә, у 4-април пәйшәнбә күни хитайға йетип барған.

У, бу қетимлиқ зияритидә хитайниң малийә рәһбәрлири вә дөләт әмәлдарлири билән көрүшидикән. Улар, хитайниң муавин баш министири хе лифең, хитай мәркизи банкисиниң башлиқи пән гоңшең, сабиқ муавин баш министир лю хе вә хитайда тиҗарәт қиливатқан америка ширкәтлириниң вәкиллири, оқуғучилар қатарлиқларни өз ичигә алидикән.

Җәнет йелен ханим мухбирларға қилған сөзидә өзиниң бу қетимлиқ зияритиниң “америка президенти җов байден билән хитай дөләт рәиси ши җинпиң 2022-йили сан-фирансискода көрүшкәндики диялогниң давами” болидиғанлиқини ейтқан. У сөзидә “американиң әндишисиниң иқтисадтики баравәрлик мәсилиси икәнликини, американиң һазир хитайниң ишләпчиқириш иқтидариниң ешип кетишини кәлтүрүп чиқиридиған бир қатар кәсипләргә ғайәт зор мәбләғ селишидин әндишә қилидиғанлиқини” билдүргән.

У буниңда хитайниң йешил енергийә саһәсидики карханиларға дөләт толуқлимиси беришиниң башқа дөләтләргә бесим пәйда қиливатқанлиқини ейтқан.

Йелин ханимниң учришишиниң икки дөләтниң сода ихтилаплирини һәл қилишқа пайдилиқ болидиған-болмайдиғанлиқи һазирчә ениқ әмәс.

Бир күн аввал, америка президенти җов байден икки йил аридин кейин тунҗи қетим хитай дөләт рәиси ши җинпиң билән телефонда көрүшкән иди. Икки рәһбәрниң тәйвән мәсилиси, сүний әқил вә хәвпсизлик мәсилилирини музакирә қилғанлиқи хәвәр қилинмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.