Доналд трамп: “сода урушида биз қандақла қилсақ хитайни йеңивалимиз”

• Мухбиримиз сада
  2019-04-16

Америка-хитай сода уруши изчил кәскинлишиватқан бир пәйттә, америка президенти доналд трамп мәйли қандақ ишлар йүз беришидин қәтийнәзәр, өзлириниң бу урушта чоқум йеңип чиқалайдиғанлиқиға ишинидиғанлиқини билдүргән.

“ройтерс” агентлиқиниң 15-апрелдики хәвиридин мәлум болушичә, америка президенти доналд трамп шу күни миниссота штатиниң бурнсвил шәһиридә юмилақ үстәл сөһбитидә болған. Сөһбәт җәрянида у хитай билән болған содида келишиш яки келишәлмәсликидин қәтийнәзәр, охшашла йеңип чиқалайдиғанлиқини җакарлиған. 

Хәвәрдә дейилишичә, америка вә хитайдин ибарәт дунядики икки чоң сода дөлити арисидики сода уруши тоққуз айдин буян изчил давам қиливатқан болуп, һазирға қәдәр толуқ бир йәргә келәлмигән. 

Америка малийә министири стивен мнучин 15-апрел күни американиң “фокс сода тори” ға қилған сөзидә, содида келиштүргүчиләрниң бу қетимлиқ сода урушида көп тиришчанлиқларни көрсәткәнликини ейтип өткән. Униң дейишичә, бу хил тиришчанлиқлар давамлиқ давамлишидикән.