Xitay hökümiti öz xelqini amérikagha qarshi “Xelq urushi” qozghashqa chaqirghan

Amérika prézidénti donald tramp 300 milyard dollarliq xitay mehsulatlirigha tamozhna béji qoyush heqqide bésharet bergendin kéyin, béyjing da'iriliri xitay xelqini amérikagha qarshi “Xelq urushi” qozghashqa chaqirghan.

“Xewerler waqti” torida 14-may élan qilin'ghan xewerge qarighanda, xitayning hökümet taratquliri tramp hökümitining xitay mallirigha qaratqan zor sommiliq tamozhna béji siyasitige “Achköz we menmenchi” dep hujum qilghan we uninggha qarshi “Xelq urushi” qozghash heqqide maqale élan qilghan.

“Yershari waqti géziti” xitay kompartiyesining kaniyi bolghan “Shinxu'a agéntliqi” ning bu heqtiki xewiridin neqil keltürüp, “Amérika bilen xitay otturisidiki soda urushida amérika terep achközlük we menmenchilik qiliwatidu, ularning bu nochiliqi haman bir küni sunidu. Bizning qilmaqchi bolghinimiz ular bilen éliship, özimizning hoquqini qoghdashtur,” dégen.

Bash maqalide yene munular bayan qilin'ghan: “Amérikadiki soda urushini bir adem we bir hökümet berpa qilidu, emma u pütün bir dölettiki ahalilerning hemmisige tesir körsitidu. Xitaydiki her millet xelqi bu qétimliq soda urushining tehditige uchridi, biz üchün bu bir meydan heqiqiy ‛xelq urushi‚ dur.”

Ötken hepte xitay hökümiti amérika-xitay soda kélishimining deslepki nusxisidiki mezmunlarni pütünley özgertip, amérikining yadroluq teleplirige qoshulmaydighanliqini ishare qilghan idi. Shundin kéyin, tramp hökümiti xitayning jem'iy 300 milyard dollarliq mehsulatlirigha tamozhna béji qoyidighanliqtin bésharet bergen idi.