Америка билән хитай арисидики сода уруши кәскинләшмәктә

Мухбиримиз ирадә
2019-05-16
Елхәт
Пикир
Share
Принт

Америка президенти доналд трамп 15-май күни американиң дөләт хәвпсизликигә тәһдит пәйда қиливатқан дөләтләрдин учур-алақә әслиһәлирини сетивелишни чәкләйдиған бир президент қарарнамисиға имза қойған иди.

Бу қарарнамидә мәлум бир дөләт яки ширкәтниң исми очуқ тилға елинмиған, бирақ көзәткүчиләр бу қарар арқилиқ хитайниң хуавей ширкитиниң америка базириға киришини үнүмлүк һалда чәклигили болидиғанлиқини илгири сүрмәктә. 

Б б с ниң бу һәқтики хәвиригә қариғанда, 16-май күни хитай ташқи ишлар министирлиқиниң баянатчиси лу каң хуавей шеркитини нишан қилған бу қарарға наразилиқ билдүрүп, «америка президенти трамп дөләт бихәтәрлики дегән баһанә билән чәтәл шеркәтлиригә зиянкәшлик қиливатиду» дегән. У йәнә хитай һөкүмитиниң буниңға қарши тәдбир алидиғанлиқини билдүргән, бирақ у буниң тәпсилатлири үстидә тохталмиған. 

Америка президенти трампниң сабиқ мәслиһәтчиси ситив бәннен с н б с хәвиригә қилған сөзидә президент трампниң хитай билән болған елишишта чекинмәйдиғанлиқини билдүргән вә «хитай 20 йилдин буян бизниң демократийимизни суйиистемал қилип кәлди,» дегән.

Америка-хитай арисидики сода уруши кәскинлишиватқан бир пәйттә америка билән русийә арисида чиқиватқан баһар шамили диққәт қозғаватқан нуқта болуп қалди. 

С н н ниң хәвиригә қариғанда, америка ташқи ишлар министири майк помпейо 14-май күни русийә президенти владимир путин билән көрүшкәндә президент трампниң мунасивәтләрни яхшилаш вә һәмкарлишиш арзулирини баян қилған. 

Дәл шу пәйттә йәнә русийә президент мәһкимисиниң баянатчиси димитрий песков америка билән хитай оттурисидики сода уруши үстидә бәргән баянатида, «америка билән хитай арисидики сода уруши йәршари иқтисадиға сәлбий тәсир көрситиду. Бирақ бу урушниң русийә иқтисадиға көрситидиған тәсирини мубалиғиләштүрмәслик лазим. Америка билән хитай икки дөләт арисидики сода уруши кәскинлишиши мумкин, бирақ бу бизниң урушимиз әмәс,» дегән.

Пикирләр (0)
Share
Толуқ бәт