Amérika bilen xitay arisidiki soda urushi keskinleshmekte

Muxbirimiz irade
2019-05-16
Élxet
Pikir
Share
Print

Amérika prézidénti donald tramp 15-may küni amérikaning dölet xewpsizlikige tehdit peyda qiliwatqan döletlerdin uchur-alaqe eslihelirini sétiwélishni chekleydighan bir prézidént qararnamisigha imza qoyghan idi.

Bu qararnamide melum bir dölet yaki shirketning ismi ochuq tilgha élinmighan, biraq közetküchiler bu qarar arqiliq xitayning xu'awéy shirkitining amérika bazirigha kirishini ünümlük halda chekligili bolidighanliqini ilgiri sürmekte. 

B b s ning bu heqtiki xewirige qarighanda, 16-may küni xitay tashqi ishlar ministirliqining bayanatchisi lu kang xu'awéy shérkitini nishan qilghan bu qarargha naraziliq bildürüp, "Amérika prézidénti tramp dölet bixeterliki dégen bahane bilen chet'el shérketlirige ziyankeshlik qiliwatidu" dégen. U yene xitay hökümitining buninggha qarshi tedbir alidighanliqini bildürgen, biraq u buning tepsilatliri üstide toxtalmighan. 

Amérika prézidénti trampning sabiq meslihetchisi sitiw bennén s n b s xewirige qilghan sözide prézidént trampning xitay bilen bolghan élishishta chékinmeydighanliqini bildürgen we "Xitay 20 yildin buyan bizning démokratiyimizni suyi'istémal qilip keldi," dégen.

Amérika-xitay arisidiki soda urushi keskinlishiwatqan bir peytte amérika bilen rusiye arisida chiqiwatqan bahar shamili diqqet qozghawatqan nuqta bolup qaldi. 

S n n ning xewirige qarighanda, amérika tashqi ishlar ministiri mayk pompéyo 14-may küni rusiye prézidénti wladimir putin bilen körüshkende prézidént trampning munasiwetlerni yaxshilash we hemkarlishish arzulirini bayan qilghan. 

Del shu peytte yene rusiye prézidént mehkimisining bayanatchisi dimitriy péskow amérika bilen xitay otturisidiki soda urushi üstide bergen bayanatida, "Amérika bilen xitay arisidiki soda urushi yershari iqtisadigha selbiy tesir körsitidu. Biraq bu urushning rusiye iqtisadigha körsitidighan tesirini mubalighileshtürmeslik lazim. Amérika bilen xitay ikki dölet arisidiki soda urushi keskinlishishi mumkin, biraq bu bizning urushimiz emes," dégen.

Toluq bet