Amérika dölet mejlisi ezasi jon mikkeyn: xitayning qiliwatqanliri zomigerlik

Amérika dölet mejliside yüksek nopuzgha ige zatlardin, kéngesh palata ezasi jon mikkeyn, xitayning nöwette xelq'ara sehnidiki heriketlirining bir xil zorawanliq ikenlikini otturigha qoyghan.

U bu sözlirini 30-may awstraliyening sidnéy uniwérsitétida sözligen nutqida tilgha alghan.

Xitayche b b s ning bügünki bu heqtiki xewiride bayan qilinishiche, jon mikkeyn ochuq halda mundaq dégen: “Nöwettiki xiris, xitay iqtisadi jehettin tereqqiy qilghanséri xelq'ara ishlarda zomigerliship kétiwatidu, mesilen, qanuniy asasi bolmighan halda térritoriye telep qilip toxtimay bayanatlarni bériwatidu؛ soda we mebleghni qoshna döletlerni gepke kirgüzüshning wasitisi süpitide qolliniwatidu, bashqa döletlerning bilim-mülük hoquqini oghrilawatidu.”

Mikkeyin bixeterlik mesilisi üstide toxtalghanda, xitayni omumyüzlük islahatqa yüzlendürüsh we asiya tinch okyan rayonida hemme döletler üchün adil iqtisadiy riqabet muhiti yaritish üchün, awstraliyeni amérika bilen hemkarliqta ching turushqa chaqirghan. Amérikaning mezkur rayondiki herbiy küchini ashuridighanliqini tekitligen mikkeyn özining bu témida prézidént donald tramp bilen pikir birdeklikige ige ikenlikini bayan qilghan.