Америка билән хитайниң дөләт мудапиә министирлири 2022-йилдин бери тунҗи қетим йүзтуранә көрүшкән

Вашингтондин мухбиримиз әркин тәйярлиди
2024.05.31

Америка дөләт мудапиә министири лилойид аустен 31-май күни хитай дөләт мудапиә министири доң җүн билән сингапорда көрүшүп, икки дөләт арисида талаш-тартиштики мәсилиләр, болупму тәйвән боғузи, хитай-русийә мунасивәтлири вә җәнубий деңиз мәсилилиридики әндишисини оттуриға қойған. Икки дөләт мудапиә министирлириниң арисидики бу учришиш, уларниң 2022-йилидин бери елип барған тунҗи йүзтуранә көрүшүши һесаблиниду.

Америка кабеллиқ хәвәрләр тори CNN ниң америка дөләт мудапиә министирлиқи әмәлдарлиридин нәқил кәлтүрүп бәргән хәвиридә қәйт қилинишичә, бу учришишта лилойид аустен хитай армийәсиниң тәйвән боғузидики йеқинқи “иғвагәрчилик” һәрикәтлири, шундақла хитайниң “русийә һәрбий санаәт базилирини қоллашта ойнаватқан роли” ға қарита әндишилирини билдүргән.

Хәвәрләрдә, лилойид аустенниң доң җүнгә америка хәлқара қанунлар йол қойған даиридә өзиниң бу районлардики һәрикитини “бихәтәр вә мәсулийәтчанлиқ” билән давамлаштуридиғанлиқини “ениқ ейтқанлиқи” қәйт қилинмақта. CNN Ниң ейтишичә, лилойид аустенниң сөзи хитайниң бу райондики хәлқара деңиз вә һава бошлуқида елип бериватқан таҗавузчилиқ хаһишидики чарлаш һәрикәтлиригә қарши актип позитсийәдә туридиғанлиқини көрситидикән. Хитай армийәси бу айниң 20-күни тәйвән пирезиденти ләй чиңдениң қәсәм берип вәзипигә олтурушиниң арқисидинла кәң көләмдә тәйвәнни қоршап қуруқлуққа чиқиш бирләшмә маневири өткүзүп, тәйвәнгә қораллиқ тәһдит салған. Буниң алдида, филиппинға тәһдит селип, униң деңиз чарлаш сақчилириға иғвагәрчилик қилған. Буниң билән америка һөкүмити, әгәр хитай филиппинға қораллиқ һуҗум қилса, америка-филиппин хәвпсизлик шәртнамисиниң һәрикәткә келидиғанлиқини агаһландурған, шундақла филиппин билән өткән айда өткүзгән һәрбий маневирда филиппинға оттура мусапилик башқурулидиған бомба орунлаштурған иди. Хәвәрләрдә, доң җүнниң буни “район бихәтәрликигә тәһдит” дәп көрсәткәнлики, хитайниң “сәвр тақитиниң чеки барлиқи” ни билдүргәнлики, һалбуки, лилойид аустенниң әгәр хитай русийәни қоллашни давамлаштурса, “америка вә униң иттипақдашлириниң йәниму илгириләп тәдбир қоллинидиғанлиқи ениқ ейтқанлиқи” қәйт қилинмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.