Amérika bilen xitayning dölet mudapi'e ministirliri 2022-yildin béri tunji qétim yüzturane körüshken

Washin'gtondin muxbirimiz erkin teyyarlidi
2024.05.31

Amérika dölet mudapi'e ministiri liloyid a'ustén 31-may küni xitay dölet mudapi'e ministiri dong jün bilen sin'gaporda körüshüp, ikki dölet arisida talash-tartishtiki mesililer, bolupmu teywen boghuzi, xitay-rusiye munasiwetliri we jenubiy déngiz mesililiridiki endishisini otturigha qoyghan. Ikki dölet mudapi'e ministirlirining arisidiki bu uchrishish, ularning 2022-yilidin béri élip barghan tunji yüzturane körüshüshi hésablinidu.

Amérika kabélliq xewerler tori CNN ning amérika dölet mudapi'e ministirliqi emeldarliridin neqil keltürüp bergen xewiride qeyt qilinishiche, bu uchrishishta liloyid a'ustén xitay armiyesining teywen boghuzidiki yéqinqi “Ighwagerchilik” heriketliri, shundaqla xitayning “Rusiye herbiy sana'et bazilirini qollashta oynawatqan roli” gha qarita endishilirini bildürgen.

Xewerlerde, liloyid a'usténning dong jün'ge amérika xelq'ara qanunlar yol qoyghan da'iride özining bu rayonlardiki herikitini “Bixeter we mes'uliyetchanliq” bilen dawamlashturidighanliqini “Éniq éytqanliqi” qeyt qilinmaqta. CNN Ning éytishiche, liloyid a'usténning sözi xitayning bu rayondiki xelq'ara déngiz we hawa boshluqida élip bériwatqan tajawuzchiliq xahishidiki charlash heriketlirige qarshi aktip pozitsiyede turidighanliqini körsitidiken. Xitay armiyesi bu ayning 20-küni teywen pirézidénti ley chingdéning qesem bérip wezipige olturushining arqisidinla keng kölemde teywenni qorshap quruqluqqa chiqish birleshme manéwiri ötküzüp, teywen'ge qoralliq tehdit salghan. Buning aldida, filippin'gha tehdit sélip, uning déngiz charlash saqchilirigha ighwagerchilik qilghan. Buning bilen amérika hökümiti, eger xitay filippin'gha qoralliq hujum qilsa, amérika-filippin xewpsizlik shertnamisining heriketke kélidighanliqini agahlandurghan, shundaqla filippin bilen ötken ayda ötküzgen herbiy manéwirda filippin'gha ottura musapilik bashqurulidighan bomba orunlashturghan idi. Xewerlerde, dong jünning buni “Rayon bixeterlikige tehdit” dep körsetkenliki, xitayning “Sewr taqitining chéki barliqi” ni bildürgenliki, halbuki, liloyid a'usténning eger xitay rusiyeni qollashni dawamlashtursa, “Amérika we uning ittipaqdashlirining yenimu ilgirilep tedbir qollinidighanliqi éniq éytqanliqi” qeyt qilinmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.