Besh burjeklik bina diqqet nuqtisini xitaygha merkezleshtürüshni tekitlidi

Amérika-xitay munasiwitidiki barghanséri éship bériwatqan yiriklikning bir ipadisi besh burjeklik bina (amérika dölet mudapi'e ministirliki) ning eng yéngi xewiridiki diqqet nuqtisini xitaygha merkezleshtürüsh toghrisidiki buyruqta eks etken. 

“Blombérg xewerliri” ning 9-iyundiki xewiride éytilishiche, amérika dölet mudapiye ministiri, général loyd astin bir kün ilgiri amérika armiyesining nöwettiki herbiy orunlashturulimisida xitayni muhim nuqta qilish heqqide bir körsetme buyruqi yollighan. Bu buyruqning mezmuni mexpiyetlik tüpeylidin élan qilinmighan. Emma besh burjeklik binaning bu heqtiki bayanatida “Bu körsetmidiki mezmunlar amérika hökümitining xitaydin kéliwatqan tehditlerge taqabil turush heqqidiki tirishchanliqigha hemdemde bolush asasida teyyarlandi,” déyilgen.

Amérika dölet mudapiye ministiri loyd astin bu heqte muxbirlargha söz qilip: “Mezkur körsetme dölet mudapiye ministirlikining ittipaqdashlirimiz bilen bolghan alaqisi'ini kücheytish, shuningdek herbiy we puqrawiy jehetlerdiki kütülmigen özgirishlerge taqabil turush qatarliqlarda muhim rol oynaydu” dégen. Jow baydén hökümiti xitay bilen bolghan munasiwetni “Keskin riqabetke tolghan” bir basquchqa qarap méngiwatidu dep tekitlewatqanda, bundaq bir körsetmining otturigha chiqishi herqaysi sahening zor diqqitini qozghimaqta. 

Xewerde éytilishiche, amérika dölet mejlisi 8-iyun küni xitay tehditige taqabil turush üchün 250 milyard amérika dolliriliq sana'et meblighini maqullighan bolup, bu mebleghning mutleq köp qismi ishlepchiqirish we téxnologiye sahesige serp qilinidiken.