Amérika mudapi'e ministiri: “Xitay Uyghur musulmanlirigha irqiy qirghinchiliq we insaniyetke qarshi jinayet yürgüzüwatidu”

• Muxbirimiz irade
  2021-08-05

Amérika mudapi'e ministiri loyd ostin seyshenbe küni sin'gapordiki ziyariti mezgilide qilghan bir sözide Uyghurlarning irqiy qirghinchiliqqa uchrawatqanliqini bildürgen.

“Férgus folls zhurnili” da élan qilin'ghan xewerdin qarighanda, amérika dölet mudapi'e ministiri loyd ostin mundaq dégen:

“Béyjingning… qanun bilen idare qilishqa hörmet qilmaydighanliqi peqet déngizdiki igilik hoquqi mesililiridila ipadilenmeydu. Biz uning hindistan'gha qilghan tajawuzchiliqini, muqimsizliq peyda qilidighan herbiy heriketlirini, teywen xelqige qilghan zorawanliqini we shinjangdiki Uyghur musulmanlirigha qiliwatqan irqiy qirghinchiliqi we insaniyetke qarshi jinayetlirini körduq”.

Melum bolushiche, mudapi'e ministiri ostin yene, xitay hökümitining Uyghurlargha yürgüzüwatqan insaniyetke qarshi jinayetlirini natsistlarning qilghan jinayetlirige sélishturghaniken.

Amérikaning nöwette wezipidiki mudapi'e ministiri loyd ostinning Uyghurlar heqqide qilghan yuqiridiki sözi küchlük diqqet qozghidi. Bu amérika hökümitining Uyghur mesilisidiki meydanini yenimu janliq namayan qilip béridiken.

Xewerdin qarighanda, mezkur yighinda ostin yene, amérikaning yaponiye we filippinning igilik hoquqi depsendichilikke uchrighan teqdirde amérikaning filippin'gha wakaliten urushqa qatnishish wedisini yene bir qétim tekitligen. U yene mundaq dégen: “Xelq'ara qanunlar boyiche béyjingning jenubiy déngizning mutleq köp qismini telep qilish asasi yoq. . … Biz shertnamilerge asasen sénkaku taqim arilidiki yaponiye we jenubiy déngizdiki filippin'gha bergen wedimizge dawamliq emel qilimiz.”

Melum bolushiche, amérikaning 70 yilliq shertname boyiche yaponiyening sénkaku arilidiki igilik hoquqini qoghdash üchün urushqa qatnishish mejburiyiti bar iken.