Америка, хитайни рәсмий һалда «пулниң алмаштуруш қиммитини контрол қилидиған дөләт» дәп атиди

Мухбиримиз ирадә
2019-08-06
Елхәт
Пикир
Share
Принт

Америка һөкүмити хитайни рәсмий һалда «пулниң алмаштуруш қиммитини контрол қилидиған дөләт» ләр қатариға киргүзди.

«Блумберг хәвәр» лиридин қариғанда, алдинқи күни хитай мәркизи банкиси американиң хитай маллириға қоюлидиған баҗни өстүрүшигә қарши өч елиш мәқситидә, хитай пулиниң алмаштуруш қиммитини қәстән төвәнлитивәткән. Нәтиҗидә, хитай пулиниң долларға алмишиш қиммити 2008-йилидин буянқи әң төвән сәвийәгә чүшкән.

Америка малийә министирлиқи болса хитайниң пулниң қиммитини қәстән өзгәртип, суйиистемал қиливатқанлиқини тәнқидлигән вә хитайни рәсмий һалда «пулниң алмаштуруш қиммитини контрол қилидиған дөләт» тизимликигә алған.

«Блумберг хәвәрлири» ториниң хәвиридә ейтилишичә, трамп һөкүмитиниң һазирғичә хитайға қарши еливатқан сода тәдбирлири гәрчә аллиқачан юқиридики тизимликкә елинған дөләтләргә қарши қоллинилидиған тәдбирләрдин ешип кәткән болсиму, әмма хитайниң рәсмий һалда «пулниң алмаштуруш қиммитини контрол қилидиған дөләт» дәп атилиши америка вә хитай арисидики мунасивәтләрниң зор дәриҗидә чекиниватқанлиқиниң әң җанлиқ ипадиси болуп һесаблинидикән.

Америка президенти доналд трамп тивиттирдики бу һәқтики инкасидиму хитай һөкүмитиниң бу һәрикитиниң хәлқарадики алақидар қанунларға хилап икәнлики вә униң ақивәттә хитайниң өзигә зиян елип келидиғанлиқини тәкитлиди.

Нурғун көзәткүчиләр буни америка вә хитай арисидики сода урушиниң давамлиқ өткүрлишип маңидиғанлиқини мөлчәрлимәктә.

Пикирләр (0)
Share
Толуқ бәт