Amérika, xitayni resmiy halda “Pulning almashturush qimmitini kontrol qilidighan dölet” dep atidi

Muxbirimiz irade
2019.08.06

Amérika hökümiti xitayni resmiy halda “Pulning almashturush qimmitini kontrol qilidighan dölet” ler qatarigha kirgüzdi.

“Blumbérg xewer” liridin qarighanda, aldinqi küni xitay merkizi bankisi amérikaning xitay mallirigha qoyulidighan bajni östürüshige qarshi öch élish meqsitide, xitay pulining almashturush qimmitini qesten töwenlitiwetken. Netijide, xitay pulining dollargha almishish qimmiti 2008-yilidin buyanqi eng töwen sewiyege chüshken.

Amérika maliye ministirliqi bolsa xitayning pulning qimmitini qesten özgertip, suyi'istémal qiliwatqanliqini tenqidligen we xitayni resmiy halda “Pulning almashturush qimmitini kontrol qilidighan dölet” tizimlikige alghan.

“Blumbérg xewerliri” torining xewiride éytilishiche, tramp hökümitining hazirghiche xitaygha qarshi éliwatqan soda tedbirliri gerche alliqachan yuqiridiki tizimlikke élin'ghan döletlerge qarshi qollinilidighan tedbirlerdin éship ketken bolsimu, emma xitayning resmiy halda “Pulning almashturush qimmitini kontrol qilidighan dölet” dep atilishi amérika we xitay arisidiki munasiwetlerning zor derijide chékiniwatqanliqining eng janliq ipadisi bolup hésablinidiken.

Amérika prézidénti donald tramp tiwittirdiki bu heqtiki inkasidimu xitay hökümitining bu herikitining xelq'aradiki alaqidar qanunlargha xilap ikenliki we uning aqiwette xitayning özige ziyan élip kélidighanliqini tekitlidi.

Nurghun közetküchiler buni amérika we xitay arisidiki soda urushining dawamliq ötkürliship mangidighanliqini mölcherlimekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.