Америка һөкүмити хитайни йәнә бир қетим «лүкчәкләр һакимийити» дәп атиди

Мухбиримиз әзиз
2019-08-09
Елхәт
Пикир
Share
Принт

Ройтерс агентлиқиниң 8-авғусттики хәвиридә ейтилишичә, америка ташқи ишлар министирлиқиниң баянатчиси морган ортагус ханим «пакитлар хитай һөкүмитиниң һәқиқәтәнму бир лүкчәкләр һакимийити икәнликини көрсәтмәктә,» деди.

Мәлум болушичә, америка ташқи ишлар министирлиқиниң бу сөзи дәл хитай-америка мунасивити сода вә һәрбий ишлар бойичә толиму назук бир басқучта туруватқанда оттуриға чиққан. Хәвәрдә ейтилишичә, хитай һөкүмити хоңкоңдики демократик хәлқ намайишини «америка һөкүмити астиртин күшкүртмәктә» дәп төһмәт қилип кәлмәктә икән. Хитай компартийәсиниң контроллуқида нәшр қилинидиған «дагоңбав» гезити болса американиң хоңкоңдики консулханисида хизмәт қилидиған бир кишиниң хоңкоң оқуғучилар вәкиллири билән бир меһманхана залида сөзлишиватқан фото рәсимини елан қилип «бу кишиниң исми җулий еда» дегән. Шундақла буниңға қошуп униң барлиқ хусусий учурлирини, бала-чақилириниң исми вә сүрәтлирини, шуниңдәк башқа мәлуматларни гезиткә басқан. Бу һәқтики хәвәргә болса «чәтәл күчлириниң хоңкоңға қол тиқиши,» дәп мавзу қойған.

Ортагус ханим мушу әһвалларни көздә тутуп «пәқәт лүкчәк һакимийәтла мушу хилдики башқиларниң хусусий учурлирини көпчиликкә ашкарилаштәк пәскәшликни садир қилиду» дегән. Шундақла чәтәл дипломатлириниң һәр саһә кишилири билән учришишиниң дипломатийәдики бир әқәллий қаидә икәнликини билдүргән.

Пикирләр (0)
Share
Толуқ бәт