Хитай “йәр шари вақит гезити” башлиқи бир хата учур сәвәбидин хитайни америка билән җәң елан қилишқа чақирған

Америка кеңәш палата әзаси җон корнин тивиттерда американиң тәйвәндә 30 миңға йеқин әскәр орунлаштурғанлиқи һәққидики хата учурни елан қиливәткәндин кейин, хитай “йәр шари вақит гезити” башлиқи ху шиҗин тивиттерда хитайни америкаға қарши җәң елан қилишқа чақириқ қилған.

Бу һәптә 17-авғуст күни елан қилинған вә аллиқачан өчүриветилгән бу учурда җон корнин “нөвәттә америка армийәсиниң корийәдә 28000 әскири, германийәдә 35 миң 486 әскири, японийәдә 50 миң әскири, тәйвәндә 30 миң әскири, африқада 7000 әскири, афғанистанда (2 ай илгири) 2500 әскири бар,” дәп язған.

Буни көргән ху шиҗин тивиттерда мундақ дәп язған: “һазир америка билән тәйвән бу мәсилини чүшәндүрүши керәк. Әгәр бу раст болса, американиң тәйвәндики әскири 30 миңдин ешип кәтмигән әһвалда, хитай армийәси дәрһал уруш қозғап, америка армийәсини қоғлап чиқириши керәк”.

“тәйвән хәвәрлири” гезитиниң хәвәр қилишичә, җон корнинниң бу учури хата болуп, 1979-йилдин буян америка тәйвәндә әскәр турғузуп бақмиған. Бу йәрдә дейилгән 30 миң америка әскири алдинқи әсирдики вейтнам уруши мәзгилидә тәйвәндә турған америка әскәрлири икән. Җон корнин бу учурни тарихий материяллардин алған болуши мумкин икән.

Бу хата учур өчүриветилгәндин кейин, ху шиҗен йәнә мундақ дәп язған: “мәнчә, бу сенатор хаталишип қалмиди, у бизниң томуримизни тутуп бақмақчи, мениң униңға беридиған җавабим шу: җәң қилиш”.

Тәһлилчиләрниң қаришичә, ху шиҗинниң бу инкаслири хитайниң тәйвән мәсилисигә тутқан позитсийәси вә кәлгүси пиланини мәлум дәриҗидә ашкарилап беридикән.