«Ню-йорк вақти» гезити обзорчиси америка-хитай арисидики урушниң тәйвәндә башлиниши мумкинликини илгири сүрди

Мухбиримиз ирадә
2019-09-05
Елхәт
Пикир
Share
Принт

«Ню-йорк вақти» гезитиниң тонулған истон язғучиси николас кристоф 4-сентәбир күнидики мақалисидә, хитай билән америка арисида әгәр уруш қозғилип қалса, буниң тәйвән сәвәбидин башлиниши мумкинликини билдүрди.

У, «уруш мана мушундақ башлиниши мумкин» намлиқ мақалисидә, һазир тәйвән билән хитай һөкүмити арисидики зиддийәт барғансери кәскинлишиватқанлиқини вә ши җинпиңниң кейинки бир қанчә йил ичидә тәйвәнгә қарши тәлвиләрчә һәрикәт қоллиниш еһтималлиқиниң юқирилиқини илгири сүргән вә буниң тәбиий һалда американиму зиддийәт ичигә сөрәп киридиғанлиқини билдүргән. 

Николас кристоф әпәндиниң баян қилишичә, тәйвән ташқи ишлар министири җосеф ву униңға һазир тәйвәндики һәр дәриҗилик әмәлдарларниң хитайдин қаттиқ әндишә қиливатқанлиқини, чүнки хитайниң иқтисадий тәрәққиятидики астилаш вә башқа мәсилиләргә қарита диққәтни бураш үчүн тәйвән мәсилисини көтүрүп чиқиш арқилиқ диққәтни бурашқа урунуш еһтималиниң юқирилиқини ейтқан. 

Униң баян қилишичә, тәйвән әмәлдарлири хитайниң қораллиқ урушидин әмәс, бәлки униң тәйвәнниң интернет-алақә системилириға вә тәйвәнни ток билән тәминләйдиған системиларға хаккерлиқ һуҗуми қилишқа охшаш васитиләрни қоллинип туруп, тәйвәндә бир малиманчилиқ пәйда қилиш арқилиқ уни тиз пүктүрүш мумкинчиликидин әндишә қилмақтикән. Тәйвән һәрбий даирилири болса бундақ әһвалларға уруш билән җаваб қайтурушни яқилайдикән вә бу, хитайниң фуҗйән өлкисигә һава һуҗуми қозғашниму өз ичигә алидикән. 

Аптор николас кристоф президент трампниң бүгүнгичә тәйвәнни қоллап кәлгәнликини, әмма бу мәсилидә хитай урушни башлимиғичә, тәйвәнниң американи урушқа башлап киридиған һәрикәтләрдин амал бар сақлинип, униң орниға хитайни чекиндүрүш ролини ойнайдиған қәдәмләрни ташлиши керәкликини әскәрткән. Аптор йәнә, хитай тәйвәнниң електр системисиға зиян бәрсә, америкаму хитайниң шаңхәй қатарлиқ чоң шәһәрлирини ток билән тәминләшни паләч һалға чүшүрүп қоюштәк васитиләр арқилиқ ши җинпиңға: «әгәр сән тәйвәнниң әркинликигә дәхли қилсаң, у һалда буниңға наһайити еғир бәдәл төләйсән» дегән сигнални очуқ йәткүзүш керәкликини әскәрткән.

Пикирләр (0)
Share
Толуқ бәт