Amérikaning yuqiri derijilik herbiy emeldari sabiq prézidént trampning xitaygha hujum qilishidin ensirigen

Amérika birleshme agéntliqining xewirige qarighanda, sabiq amérika prézidénti donald trampning wezipe ötesh mudditi ayaghlishishqa az qalghanda, amérika shtab bashliqliri birleshme yighini re'isi mark millé sabiq prézidént trampning xitaygha hujum qilishidin ensirep, xitay xelq azadliq armiye génrali li zochénggha téléfon bérip, amérikaning xitaygha hujum qilmaydighanliqini éytqan. Birinchi qétimliq téléfonni 2020-yil 10-ayning 30-küni, ikkinchi qétimliq téléfonni 2021-yil 1-ayning 8-küni urghan.

Sabiq prézidént donald tramp: “Eger bu xewerning rastliqi ispatlansa, mark millé weten'ge asiyliq qilish jinayiti bilen eyiblinishi kérek” dégen.

“Washin'gton pochtisi géziti” muxbiri bob wodward bilen robért kosta birliship yazghan “Xeter” namliq kitabta bu ish ashkarilan'ghan bolup, mark millé xitay génrali li zochénggha, eger amérika xitaygha hujum qilidighan bolsa, uninggha aldin agahlandurush béridighanliqini éytqan. Kitabta yézilishiche, mark millé birinchi qétim xitay général li zochénggha téléfon qilghanda: “Li général, sizge kapalet bérimenki, amérika hökümiti nahayiti muqim, hemme ish yaxshi bolup kétidu. Biz silerge hujum qilmaymiz we her qandaq heriket qollanmaymiz” dégen.