Роберт спалдиң: «американиң каттилири ухлап ятқанда хитай биздин пайдилинип кәткән!»

Мухбиримиз әзиз
2019-10-02
Елхәт
Пикир
Share
Принт

Хитайниң америкаға шилтиң етиши һәққидә көплигән пикирләр оттуриға чиқиватқанда америка һава армийәсиниң биригада генерали роберт спалдиң 1-өктәбир күни мақалә елан қилип, буниңдики бәзи сәвәбләр һәққидә өз қарашлирини баян қилди.

У хитайниң америкаға рәқиб болушиға мунасивәтлик ишларда алди билән америка сиясий сәһнисидики каттиларниң «хитайниң ишикини ачсақ хитай иқтисадий җәһәттин раваҗ тепип, демократийә вә әркинликкә йүзлиниду» дегән түплүк қаришиниң бәкму әҗәллик вә хата чүшәнчә болғанлиқини тәкитләйду.

Апторниң қаришичә, хитайниң ишики вә базири ечилип, хитай һөкүмитиниң янчуқиға пул чүшкәндин кейин мушу дәсмайидин пайдилинип, ғәрб дунясиниң сиясий қатлимидики сәрхилләрни чиритишкә вә демократик қиммәт қарашлирини астин-үстүн қилишқа урунуп кәлгән. Болупму хитай билән иқтисадий муамилидә болуп келиватқан дөләтләр «еғиз йесә йүз уюлупту» дегәндәк б д т вә башқа хәлқаралиқ сорунларда хитайниң депиға уссул ойнашни давам қилип кәлмәктә.

Мақалида көрситилишичә, хитай йәнә бир яқтин американиң күчләр орунлаштурмисидики аҗизлиқлардин пайдилинип, американи «соқмақчи болуп кәлмәктә» икән. Болупму американиң һәрбий ишлар җәһәттә оттура шәрқни муһим диққәт мәркизи қилиши билән униң һинди-тинч окян райониға болған контроллуқи аҗизлап қалған. Бу хил вәзийәттин толуқ пайдиланған хитай һөкүмити тездин тинч окян районида сүний аралларни бәрпа қилип, һинди-тинч окян райониға һөкүмран болушниң қазинини асқан.

Апторниң пикричә, хитайниң бу җәһәттә қолланған йәнә бир усули, иқтисадий йүксилишкә таянған һалда 5G технологийәсини зор күч билән тәрәққий қилдуруш болған. Хитай һөкүмити бу арқилиқ кәлгүсидики пән-техника саһәсини контрол қилишни муһим нишан қилған болуп, һазирқи юқири пән-техникилиқ назарәт механизми дәл мушу технологийә асасида вуҗудқа чиққан. Хитай навада г5 технологийәсиниң, тәқлидий әқил вә сифирлиқ һул муәссәләрниң мутләқ контроллуқиға игә болувалса у һалда кәлгүсидики електронлуқ сода вә иҗтимаий таратқулар хитайниң контроллуқиға чүшүп қалиду. «Фейсбук», «гогул», «амазон» дегәнләрниң орнини «бәйду», «али баба», «теңшүн» дегәнләр игиливалиду.

Аптор мушу әһвалларни омумлаштуруп «хейим-хәтәр көз алдимиздила турупту. Америка вә ғәрб дуняси әмди буниң алдини алмиса бәкму кечикиду» дәп хуласә чиқириду.

Пикирләр (0)
Share
Толуқ бәт