Robért spalding: "Amérikaning kattiliri uxlap yatqanda xitay bizdin paydilinip ketken!"

Muxbirimiz eziz
2019-10-02
Élxet
Pikir
Share
Print

Xitayning amérikagha shilting étishi heqqide köpligen pikirler otturigha chiqiwatqanda amérika hawa armiyesining birigada générali robért spalding 1-öktebir küni maqale élan qilip, buningdiki bezi sewebler heqqide öz qarashlirini bayan qildi.

U xitayning amérikagha reqib bolushigha munasiwetlik ishlarda aldi bilen amérika siyasiy sehnisidiki kattilarning "Xitayning ishikini achsaq xitay iqtisadiy jehettin rawaj tépip, démokratiye we erkinlikke yüzlinidu" dégen tüplük qarishining bekmu ejellik we xata chüshenche bolghanliqini tekitleydu.

Aptorning qarishiche, xitayning ishiki we baziri échilip, xitay hökümitining yanchuqigha pul chüshkendin kéyin mushu desmayidin paydilinip, gherb dunyasining siyasiy qatlimidiki serxillerni chiritishke we démokratik qimmet qarashlirini astin-üstün qilishqa urunup kelgen. Bolupmu xitay bilen iqtisadiy mu'amilide bolup kéliwatqan döletler "Éghiz yése yüz uyuluptu" dégendek b d t we bashqa xelq'araliq sorunlarda xitayning dépigha ussul oynashni dawam qilip kelmekte.

Maqalida körsitilishiche, xitay yene bir yaqtin amérikaning küchler orunlashturmisidiki ajizliqlardin paydilinip, amérikani "Soqmaqchi bolup kelmekte" iken. Bolupmu amérikaning herbiy ishlar jehette ottura sherqni muhim diqqet merkizi qilishi bilen uning hindi-tinch okyan rayonigha bolghan kontrolluqi ajizlap qalghan. Bu xil weziyettin toluq paydilan'ghan xitay hökümiti tézdin tinch okyan rayonida sün'iy arallarni berpa qilip, hindi-tinch okyan rayonigha hökümran bolushning qazinini asqan.

Aptorning pikriche, xitayning bu jehette qollan'ghan yene bir usuli, iqtisadiy yüksilishke tayan'ghan halda 5G téxnologiyesini zor küch bilen tereqqiy qildurush bolghan. Xitay hökümiti bu arqiliq kelgüsidiki pen-téxnika sahesini kontrol qilishni muhim nishan qilghan bolup, hazirqi yuqiri pen-téxnikiliq nazaret méxanizmi del mushu téxnologiye asasida wujudqa chiqqan. Xitay nawada g5 téxnologiyesining, teqlidiy eqil we sifirliq hul mu'esselerning mutleq kontrolluqigha ige boluwalsa u halda kelgüsidiki éléktronluq soda we ijtima'iy taratqular xitayning kontrolluqigha chüshüp qalidu. "Féysbuk", "Gogul", "Amazon" dégenlerning ornini "Beydu", "Ali baba", "Téngshün" dégenler igiliwalidu.

Aptor mushu ehwallarni omumlashturup "Xéyim-xeter köz aldimizdila turuptu. Amérika we gherb dunyasi emdi buning aldini almisa bekmu kéchikidu" dep xulase chiqiridu.

Toluq bet