"Washin'gton pochtisi" géziti tramp hökümitining 28 xitay orginini jazalighanliqini qarshi aldi

Muxbirimiz irade
2019-10-11
Élxet
Pikir
Share
Print

Amérikadiki nopuzluq gézitlerdin bolghan "Washin'gton pochtisi" géziti amérika tramp hökümitining Uyghur élide Uyghur, qazaq qatarliq yerlik musulman milletlerge qaratqan basturush siyasetlirige qatnashqan we yantayaq bolghan 28 xitay orginigha qarita jaza tedbiri élan qilghanliqini qarshi aldi.

10-Öktebir küni mezkur gézit tehrirati "Axiri, xitay yighiwélish lagérlirining bezi aqiwetliri bilen yüzleshti" mawzuluq bash maqaliside, tramp hökümitining xitay hökümitining Uyghur we bashqa musulman xelqlerning tili we medeniyitini yoq qilishni meqset qilghan heriketlirini axiri jazalighanliqini ipade qilip: "Bu tedbirler tolimu zörür idi. Bu tedbirler kéchikken bolsimu, biz uning xitay hökümiti Uyghurlar we bashqa musulmanlarni yighiwélish lagérlirida tutup turghan muddet boyiche izchil dawam qilishini telep qilimiz" dégen. 

"Washin'gton pochtisi" tehrirat hey'iti yene, amérika tashqi ishlar ministirliqining insan heqliri depsendichilikide rol oynighan xitay hökümet emeldarlirigha wiza émbargosi qoyush qararinimu alqishlighan. Ular mundaq dégen: "Wiza émbargosi qoyulghan kishilerning isimliki téxi élan qilinmighan bolsimu, emma biz uning xitay partkom sékrétari chén chüen'goni öz ichige alghan bolushini ümid qilimiz" dégen. 

"Washin'gton pochtisi" géziti xitay hökümitining Uyghur élide 2 milyon etrapida Uyghur we bashqa xelqlerni "Qayta terbiye merkizi" namidiki yéngi zaman yighiwélish lagérlirigha qamap, ulargha ménge yuyush herikiti yürgüzüwatqanliqi ashkarilan'ghandin buyan, on parchidin artuq tehrirat maqalisi élan qilish arqiliq izchil halda amérika hökümitini Uyghur mesiliside tedbir qollinishqa chaqirip kelgen idi.

Toluq bet