Amérikaning xitayda turushluq elchi namzati nikolas burns xitay heqqide keskin sözlerni qilghan

Amérika prézidénti jow baydén teripidin amérikaning xitayda turushluq bash elchilikige namzat körsitilgen nikolas burns 20-öktebir küni kéngesh palatasida ötküzülgen ispat anglash yighinida xitay heqqide keskin sözlerni qilghan. U “Xitayning Uyghurlargha qiliwatqan irqiy qirghinchiliqi choqum toxtitilishi kérek” dégen.

Burnis yighindiki sözide xitayni amérikaning “Eng xeterlik riqabetchisi” dep atap, amérikaning choqum yawropadiki shérik döletliri bilen hemkarliship, xitaygha iqtisadiy jehettin taqabil turushi kéreklikini bildürgen.

U xitayning kishilik hoquq xatirisi heqqide toxtalghanda munularni dégen: “Xitayning shinjangda yürgüzüwatqan irqiy qirghinchiliqi, tibettiki depsendichiklikliri, xongkongning aptonomiyesi we erkinlikige buzghunchiliq qilishi hemde teywen'ge qaritiwatqan zomigerliki choqum toxtitilishi kérek.”

Ispat anglash yighinida u yene amérikaning teywen démokratiyesini qoghdishi, korona wirusining menbesini tekshürüshi, xitayning yadro pa'aliyetlirini tekshürüshi kéreklikini eskertken. U hazirqi dewrdiki soghuq urushning iqtisad we pen-téxnika arqiliq bolidighanliqini eskertip, amérikaning choqum shérikliri bilen birlikte xitaygha qarshi iqtisadiy we yuqiri téxnikiliq üstünlük shekillendürüshi kéreklikini bayan qilghan.

Melum bolushiche, bu yil 65 yashqa kirgen nikolas burns pishqedem déplomat bolup, u ilgiri amérikaning shimaliy atlantik ehdi teshkilatida turushluq elchisi bolghan iken. Nöwette burnisning amérika dölet mejlisidiki her ikki partiyedin bolghan mejlis ezalirining qollishigha érishidighanliqi mölcherlenmektiken.