Dölet mejlisi ezaliri amérika alyumin zawutining xitaygha sétilishigha qarshi chiqti

Bir qisim amérika dölet mejlisi ezaliri amérikining aptomobil we awi'atsiye sana'itini alyumin mehsulatliri bilen teminleydighan “Aléris alyumin pishshiqlap ishlesh zawuti” ning xitaygha sétilishigha qarshi chiqti.

Roytérs agéntliqining xewiridin qarighanda, xitayning xelq'araliq zor alyumin shirkiti bolghan “Jong wang guruhi” amérikining “Aléris alyumin zawuti” ni sétiwélishqa teklip qoyghan.

Melum bolushiche, bu sodining qimmiti 2 milyard amérika dolliridin ashidighan bolup, zawut téxi ikki ay awwal sétishqa chiqirilghan iken. Eger bu zawut sétiwélin'ghan teqdirde, sétiwalghuchi terep amérikining téxnikisigha érishish hem shundaqla bu zawutning boying shirkiti we amérika we yawropa aptomobil shirketliri bilen alaqe ornitish pursitige érishidiken.

12 Neper amérika dölet mejlisi ezasi amérika maliye ministiri jek léwge xet yézip, mezkur sodini chekleshke chaqirghan. Xette mundaq déyilgen: “Jongwangning aléris zawutini sétiwélishi amérikining dölet xewpsizlikini ajizlashturidu. U hem amérikining muhim téxnikilirining we sezgür uchurlarning xitayning qoligha ötüp kétishige yol échip bérip, amérikining dölet menpe'itige ilgirilep ziyan salidu”.

Bu parlamént ezaliri “Jongwang guruhi”ning alliqachan chégra béji oghrilash gumani bilen tekshürüsh astigha élin'ghan bir shirketlikini eskertip, aléris zawutining sétilishigha qarap chiqidighan hey'etni agahlandurghan.