Amérika pirézidéntliq saylimining netijisi xitayni bi'aram qilishqa bashlidi

2024-Yilliq amérika pirézidéntliq saylimining netijisi élan qilinip, sabiq pirézidént donald trampning 47-nöwetlik amérika pirézidénti bolup saylinishi xitay hökümitini tolimu bi'aram qiliwatqanliqi melum. Bu hal “Foks xewerliri” ning 7-noyabirdiki xewiride orun alghan.

Xitay tashqi ishlar ministirliqining bayanatchisi maw ning saylam netijisi melum bolghandin kéyin “Dölitimizning amérika siyasiti izchil özgermeydu. Biz amérika-xitay munasiwitini öz'ara hörmet, tinchliqta bille turush we hemkarliq asasida dawam qilimiz” dégen. Emma teywen döletlik uniwérsitétning piroféssori yüen jüjéng saylam harpisida chong quruqluq sayahitidin qaytip kelgen bolup, bu heqte “Foks xewerliri” ning ziyaritini qobul qilghan. U, xitay ahalisining omumyüzlük halda “Donald trampning pirézidént bolup saylinishi biz üchün zulmetlik bir boran-chapqundin bésharet” dep qaraydighanliqini, yalghuz xitay puqralirila emes, xitaydiki köpligen mutexessislerningmu “Tramp pirézidént bolup qalsa bundin kéyinki töt yil ikki terep munasiwitini tarixtiki eng nachar ehwalgha chüshürüp qoyidu” dep qaraydighanliqini alahide eskertken.

Bolupmu donald tramp saylam riqabiti jeryanidiki nutuqlirida köp qétimlap ishlepchiqirish nuqtilirini amérika tewesige qayturup kélish we xitaydin import qilinidighan tawarlargha hessilep baj qoyushning zörürlükini tekitligen. Bu hal uning sabiq pirézidént bolup xizmet qilghan mezgilidiki “Xitay bilen bolidighan soda urushi” mesilisini bu qétim yéngidin küntertipke élip chiqidighanliqidin ashkara bésharet, dep qaralghan. Shunga xitay iqtisadi lingship qéliwatqan bundaq weziyette ishlepchiqirish we éksportqa tayinip iqtisadni yükseldürüwatqan xitay üchün buning qattiq zerbe bolidighanliqi xitaylarni bekmu endishige salghan. Xitay ijtima'iy taratquliridiki ray sinash mutleq köp qisim xitaylarning “Amérika izchil bizni qismaqqa élishni qestleydu” dep qaraydighanliqini körsetken.

Xewerde éytilishiche, buknél uniwérsitétining ju famililik xitay piroféssori bu heqte toxtilip: “Hazir 80 pirsent amérika xelqi xitay heqqide selbiy qarashta. Bu bekmu qorqunchluq ré'alliq” dégen.