Xitay amérikaning "Uyghur kishilik hoquq qanuni" seweblik "Bedel töleydighanliqi" ni bildürdi

Muxbirimiz erkin
2019-12-04
Élxet
Pikir
Share
Print

Amérika awam palatasining 3‏-dékabir küni bélet tashlap, mutleq köp awaz bilen "Uyghur kishilik hoquq qanun layihesi" ni maqullishigha gholluq xitay dölet apparatlirining hemmisi dégüdek bayanat élan qilip, amérikagha naraziliq bildürdi. Firansiye agéntliqining xewer qilishiche, xitay 4‏-noyabir küni amérikani agahlandurup, uning mezkur qanun seweblik "Tégishlik bedel töleydighanliqi" ni tekitligen.

Amérika awam palatasi 3‏-dékabir küni özining "Uyghurlargha ige chiqish we dunyawi insanperwerlikning ortaq inkasi" yeni "Uyghur 2019" namliq qanun layihesini awazgha qoyup, 1 ge qarshi 407 awaz bilen maqullighan. Mezkur qanun'gha xitayning memliketlik xelq qurultiyi, memliketlik siyasiy kéngishi, tashqi ishlar ministirliqi, döletlik milliy ishlar komitéti, térrorluqqa qarshi turush ishxanisi, Uyghur aptonom rayonluq hökümet, aptonom rayonluq xelq qurultiyi, siyasiy kéngishi, shinxu'a agéntliqi qatarliq organlarning hemmisi naraziliq bildürgen. Ular naraziliqida xitayning Uyghur rayonida térrorluq we esebiylikke qarshi turushni bahane qilip, élip barghan basturush heriketlirini birdek aqlighan.

Firansiye agéntliqining xewiride bildürüshiche, xitay tashqi ishlar ministirliqi bayanatchisi xu'a chünying, amérikaning "Barliq xata herikiti we sözliri üchün. . . . . . . . Tégishlik bedel tölishi kérekliki" ni tekitligen. Lékin u bu qanunning soda söhbitige qandaq tesir körsitidighanliqigha baha bermigen. Uyghur aptonom rayonluq hökümet 4‏-dékabir élan qilghan bayanatida, amérika awam palatasining bu qanunni maqullap, "Xitayning ichki ishlirigha qopalliq bilen arilashqanliqi, xelq'ara qanun we munasiwetler nizamigha éghir xilapliq qilghanliqi" ilgiri sürülüp, "Zorawan térrorluq heriketlirige qet'iy zerbe bérish, esebi idiyelerning yamrishini tosush shinjangning ijtima'iy muqimliqi we uzun mezgillik eminlikini qoghdashning jiddiy éhtiyajidur" déyilgen.

Uyghur aptonom rayonluq xelq qurultiyining mudiri shawket éminning namida élan qilin'ghan bayanatta, rayonda élip bérilghan térrorluq-esebiylikke qarshi heriketlerde qanunlargha emel qilin'ghanliqi tekitlen'gen. Lékin amérika awam palatasining "Uyghur kishilik hoquq qanun lahiyesi" tilgha élinmighan. Awam palatasining mezkur qanun layihisi Uyghur diyaridiki Uyghur we bashqa türkiy musulmanlarni basturuwatqan xitay emeldarlirini jazalash, bu rayondiki basturushta amérika téxnikisining ishlitilishini cheklesh qatarliq mezmunlarni öz ichige alghan idi.

Toluq bet