Доналд трамп сабиқ кеңәш палата әзаси давид пердуни хитайда турушлуқ баш әлчиликкә көрсәткән

Келәр ай вәзипә тапшурувалидиған пирезидент доналд трамп американиң хитайда турушлуқ баш әлчиликигә сабиқ кеңәш палата әзаси вә “фортун 500” ширкитиниң баш иҗраийә әмәлдари давид перду (David Perdue) ни көрсәткән.

NBC Хәвәрләр ториниң билдүрүшичә, доналд трамп бу қарарини җакарлиғанда “давид пердуниң 40 йиллиқ хәлқаралиқ сода һаятини баштин кәчүргән вә америка кеңәш палатасида хизмәт қилған бири болуш сүпити билән, қиммәтлик тәҗрибилири арқилиқ американиң хитай билән болған мунасивәтлирини қурушиға ярдәм беридиғанлиқини” билдүргән.

Хәвәрдә дейилишичә, давид перду кәспий һаятиниң көп қисмида хитай, сингапор, хоңкоң вә башқа асия дөләтлиридә ишлигәникән.

Трамп мундақ дегән: “у мениң район тинчлиқини қоғдаш истратегийәмни йолға қоюшта һәм шундақла хитай рәһбәрлири билән үнүмлүк хизмәт мунасивити орнитишта муһим рол ойнайду”.

2025-Йили 1-айда вәзипигә олтуридиған доналд трамп вәзипини рәсмий өткүзүвалғандин кейин хитай маллириға %60 яки униңдин юқири таможна беҗи қойидиғанлиқини дәп кәлмәктә. Униң бу нөвәтлик йеңи кабинетиға қойған муһим кишилириниң көпинчисиниң хитайға қаттиқ қоллуқ сиясәт йүргүзүшни тәшәббус қилғучилар болғачқа, америка-хитай мунасивәтлириниң бундин кейинки тәрәққияти күчлүк диққәт нуқтиси болуп қалди.

Сабиқ кеңәш палата әзаси давид пердуниң хитайда турушлуқ баш әлчи қилип көрситилиши америка дөләт мәҗлиси тәрипидин тәстиқланғандин кейин андин рәсмийлишиду.