Xitay amérikining ademsiz charlash üskünisini qayturup bergen

Xitay mudapi'e ministirliqi seyshenbe küni bayanat élan qilip, amérikining jenubiy déngizdiki ademsiz charlash üskünisini qayturup bergenlikini bildürdi.

Xitay déngiz mudapi'e qisimliri 15‏-dékabir küni jenubiy déngizda amérikining bir ademsiz su asti tekshürüsh eswabini qolgha chüshürüwalghandin kéyin, amérika buninggha naraziliq bildürüp, xitaydin uni derhal qayturup bérishni telep qilghan idi.

Roytérs agéntliqining xewer qilishiche, bügün xitay mudapi'e ministirliqi bayanatida, amérika-xitay ikki terepning dostane söhbitidin kéyin, bu üskünining amérikigha qayturup bérilgenlikini bildürgen bolsimu, emma bashqa tepsilatlar üstide toxtalmighan. Xitay tashqi ishlar ministirliqi bayanatchisimu bu heqtiki so'allargha jawab bermigen.

Amérika mudapi'e ministirliqi bolsa bügünki bayanatida, mezkur üskünining qanunsiz qolgha chüshürüwélin'ghan orunda qayturup bérilgenlikini testiqlash bilen birge, xitayni xelq'ara qanunlargha xilap heriketlirini toxtitishqa chaqirghan. Pentagon bayanatida yene, jenubiy déngizning xelq'ara seperge ochuqluqini qayta eskertip, amérikining u yerde qanunluq déngiz seperlirini we uchushlirini dawam qilidighanliqini bildürgen.

Roytérsning éytishiche, xitayning amérikigha tewe ademsiz charlash üskünisini éliwélishi uning jenubiy déngizdiki herbiy mewjutluqining zoriyishi we igilik hoquq detalishidiki ushshuqluqi qozghawatqan endishilerni yene bir hesse kücheytken. Bu xil ademsiz charlash üskünisi adette déngiz-okyanlarning témpératurisi we chongqurluqigha oxshash sanliq melumatlarni yighish üchün ishlitilidighan bolup, amérika déngiz armiyisining bundaq üskünisidin dunyaning herqaysi jaylirida jem'iy 130 dane etrapida bar iken.