Amérikining xitayda turushluq bash elchisi doxtur gülshen abbas qatarliqlarni qoyup bérishni telep qilghan

Amérikining xitayda turushluq bash elchi nikolas burns (Nicholas Burns) 12-ayning 10-küni “Dunya kishilik hoquq küni” munasiwiti bilen bayanat élan qilip, xitayning Uyghur, tibet we xongkongluqlargha qarshi dawamlashturuwatqan kishilik hoquq depsendichiliklirini toxtitishqa chaqirghan. Shundaqla ta hazirghiche türmide yétiwatqan doxtur gülshen abbas, karxanichi ekber eset we tetqiqatchi rahile dawut qatarliqlarni qoyup bérishni telep qilghan.

10-Dékabir küni, b d t “Dunya kishilik hoquq xitabnamisi” élan qilin'ghanliqining 76-yilliqi munasiwiti bilen, amérikining béyjingda turushluq elchixanisining torida élan qilin'ghan bayanatta mundaq déyilgen:

 “Biz xitay jumhuriyitini shinjang, tibet we xongkongda élip bériwatqan kishilik hoquq depsendichiliklirini toxtitishqa chaqirimiz. Xitay jumhuriyitining insaniy erkinliklerni cheklishige hem dölet halqighan basturushigha bolghan chongqur endishimizni qayta tekitleymiz. Kishilik hoquq we insaniy izzet-hörmetni qoghdighanliqi, öz étiqadini ipadiligenliki, din we medeniyet pa'aliyetlirige qatnashqanliqi üchün jazalan'ghan gülshen abbas, ekber eset we rahile dawut qatarliqlarning derhal we shertsiz qoyup bérilishni telep qilimiz”.

Bayanatta yene, xitay jumhuriyitini “Özining kishilik hoquq emeliyitini közdin kechürüshke, xelq'ara kishilik hoquq mejburiyitige emel qilip, öz xelqige bergen wedilirini ada qilishqa chaqiridighanliqi” tekitlen'gen.