Amérika xitayning eqliy mülük oghriliqi sewebidin yiligha 600 milyard dollar ziyan tartmaqtiken

Washin'gtondin muxbirimiz irade teyyarlidi
2024.05.16

Amérikadiki “Dölet menpe'eti” namliq zhurnalning xewer qilishiche, xitayning amérikaning eqliy mülüklirige qaratqan tor jasusluq heriketlirining netijiside, amérika yiligha 200 milyard dollardin 600 milyard dollarghiche iqtisadiy ziyan tartmaqtiken.

Xewerde körsitilishiche, hazirghiche xitay xakkérliri milyonlighan amérikaliq ishchi-xizmetchining bixeterlik arqa körünüshi, barmaq izi, saghlamliq uchurliri we maliye xatirisini öz ichige alghan intayin sezgür uchurlirini oghrilap ketken. Ular yene üzlüksiz dawam qildurghan tor jasusluqi arqiliq marri'ot méhmansaray zenjirlirige a'it 500 milyondin artuq sayahetchi we shexsning shexsiy uchurini, ékwifakis shirkitining 145 milyondek maliye we shexsiy uchur xatirisini, shuningdek antém (Anthem) shirkitige a'it 78 milyondek maliye, saqliq saqlash we shexsiy uchur xatirisini oghrilap ketken. Xitay hetta amérikaliqlarning DNA sanliq melumatlirini nishanlighan.

Uningda körsitilishiche, yuqiriqilar xitayning toxtawsiz qiliwatqan tor hujumlirining peqet bir qismi bolup, ular buninggha nurghun adem küchi ajratqan. Xitayning istixbarat da'irilirige tewe xakkérlirini hésabqa almighanda, peqet xitay armiyesi ichidiki xakkérlarning özila 40 ming neperdin ashidiken.

Yéqinqi yillardin buyan amérika fédératsiye tekshürüsh idarisi xitayning jasusluq heriketlirige qarshi tekshürüshni shiddet bilen ashurghan bolup, xitayning tor jasusluqigha da'ir mewjut aktip délo 2000 din ashidiken. Bularning köpi iqtisadiy jasusluqqa chétilidighan bolup, yéqinqi yillarda xitayning iqtisadiy jasusluqi 1300 pirsent ashqan.

Xewerde yene tor jasusluq heriketlirining xitay dölet xewpsizliki ministirliqi we xitay armiyesige biwasite chétilidighanliqi bayan qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.