“Awan'gart mulazimet guruhi” qeshqerde meshiq bazisi qurghanliqi heqqidiki xewerlerni ret qilghan

Muxbirimiz irade
2019.02.01
Share on WhatsApp
Share on WhatsApp

Roytérs agéntliqining xewer qilishiche, xongkongni baza qilghan “Awan'gart mulazimet guruhi” özining xitayche resmiy tor bétide 22-yanwar küni özlirining Uyghur rayon da'iriliri bilen qeshqerde bir herbiy meshiq bazisi qurush üstide kélishkenlikini jakarlap bir bayanat élan qilghan.

Peyshenbe küni roytérs agéntliqi bu bayanatni xewer qilghan. Biraq, xewerdin kéyin mezkur shirket bayanatni tordin éliwetken. Shirket bayanatchisi roytérsqa qilghan sözide, “Bu bayanatni béyjingdiki shirket xizmetchisining xataliship élan qilip qoyghanliqini, shirket bashliqi érik prinsning xitayning gherbide bundaq bir baza échish mesilisidin xewiri yoqluqini” ilgiri sürgen.

“Awan'gart mulazimet guruhi” iraq urushi dewride nami chiqqan “Qara su” shirkitining qurghuchisi érik prins teripidin teshkil qilin'ghan bolup, érik prinsning xitay hökümiti bilen toxtamliship, xitayning yünnen ölkisi we Uyghurlar diyarida meshiq bazisi achmaqchi bolghanliqi heqqidiki xewerler 2017-yilining otturiliridin bashlap, herqaysi metbu'atlarda orun alghan idi. Uyghur élide “Esebiylikke qarshi turush” we “Térrorluqqa zerbe bérish” heqqidiki sho'arlar toxtimastin towliniwatqan mushundaq bir peytte, xitay hökümitining mezkur shirketning meshiqlendürüsh bazisini qurmaqchi bolghanliqi küchlük diqqet qozghighan idi.

Gerche shirket bayanatchisi yuqiriqidek ehwalni ret qilghan bolsimu, emma shirketning xitayche tor bétidin öchürüwétilgen bayanatta “Awan'gart mulazimet guruhi” ning qeshqer da'iriliri bilen qeshqerning tumshuq shehiridiki sawxu pen-téxnika bazisi qarmiqida bir meshiq bazisi qurush kélishimini imzalighanliqi, 11-yanwar küni béyjingda ötküzülgen imzalash murasimigha tumshuq sheherlik hökümet xadimliri we “Awan'gart mulazimet guruhi” hessidarliridin bolghan “Go'en qurulush shirkiti” xadimlirining qatnashqanliqidek tepsilatlar bayan qilin'ghan.

“Washin'gton pochtisi géziti” ötken 8-ayda xongkongni baza qilghan “Awan'gart mulazimet guruhi” ning qeshqerde meshiq bazisi qurup, xitaygha bixeterlik xadimlirini terbiyelep bériwatqanliqi heqqide bir xewer tarqatqan idi. Ularning ilgiri sürüshiche, qeshqerning jenubidiki melum bir jayda qurulghan bu meshiq bazisi béyjingdiki xelq'ara bixeterlik we mudapi'e mektipige qarashliq iken.

Xewerde, uning xitaydiki tunji xususiy bixeterlik shirkiti ikenliki, béyjingdiki xelq'ara bixeterlik we mudapi'e mektipining qeshqerdin bashqa yene yünnen qatarliq jaylardimu meshiq bazisi barliqini, hazir bu mektepning 25% pay chékini “Awan'gart mulazimet guruhi” ning kontrol qilidighanliqi bildürülgen. “Washin'gton pochtisi” géziti eyni chaghdiki xewiride, érik prinsning herikitining amérika hökümitidiki alaqidar emeldarlarni bi'aram qiliwatqanliqini, gerche bu, érik prinsning xitay hökümiti bilen yéqin munasiwiti barliqini körsetsimu, emma uning bu heqtiki gumanlarni ret qilghanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet