Amérika-xitay otturisidiki herbiy munasiwet keskinleshmekte

Muxbirimiz sada
2018-10-03
Élxet
Pikir
Share
Print

Yéqindin buyan amérika bilen xitay otturisidiki soda urushi jiddiy élip bériliwatqan bir peytte jenubiy déngizda yüz bergen herbiy paraxot weqesi seweblik ikki dölet arisidiki soghuq munasiwet yenimu küchiyishke bashlighan.

Firansiye agéntliqining bügün, yeni 3-öktebir élan qilghan xewiride jenubiy déngiz rayonida amérika déngiz armiyesining bir paraxoti bilen xitay herbiy paraxotining "Xeterlik uchrishishi" yüz bergenliki bayan qilin'ghan. Xewerdin melum bolushiche, ötken yekshenbe küni amérikining bir herbiy paraxoti xitayning jenubiy déngiz rayonida öz aldigha belgiliwalghan da'iridin ötüp ketkenlik sewebidin xitayning bir herbiy paraxoti 41 métir da'ire ichide amérikining qoghlighuchi paraxotigha yéqinliship, uni derhal belgilen'gen da'iridin chiqip kétishke zorlighan.

Bu hadisige qarita amérikining aliy derijilik dölet mudapi'e tetqiqati analizchisi timosiy xis inkas qayturup, mundaq dégen: "Bu qétimqi amérika-xitay herbiy paraxotlirining uchrishishi ikki dölet herbiy paraxotlirining eng yéqin da'iridiki doqurushup qélishi hésablinidu. Bu doqurushush amérika-xitay munasiwitige tesir körsetkendin bashqa yene béyjing da'iriliriningmu kelgüside amérikini jenubiy déngiz arqiliq sinishida belgilik tesiri bolushi mumkin. "

Xewerdin melum bolushiche, amérika-xitay armiyeliri 2014-yili ikki dölet arisida aldin pilanlanmighan déngiz uchrishishliri nizamini yolgha qoyup, ikki dölet déngiz armiyesi arisida tasadipiy sewenlik körülüshining aldini élish pütümi maqullan'ghan iken. Emma bu qétimqi weqening béyjing da'irilirining buyruqi yaki xitay herbiy paraxoti kapitanining xahishi seweblik kélip chiqqanliqi éniq emes iken.

Aldinqi hepte amérika dölet mudapi'e ministiri jim mettis bilen xitay herbiy emeldari wéy féngxéning béyjingda ötküzülmekchi bolghan uchrishishi wéy féngxéning uchrishishqa kélelmeydighanliqini uqturushi seweblik emeldin qalghan idi. Halbuki, amérika tashqi ishlar ministiri mayk pompiyo kéyinki düshenbe küni xitayda ziyarette bolidighanliqini bildürgen. Uchrishishning mezmuni asasliqi ikki dölet munasiwiti üstide pikir almashturup, xelq'araliq we yerlik mesililer muzkire qilinidighanliqi xewer qilin'ghan, biraq tepsilati eskertilmigen.

Toluq bet