Mayk galigér: “Amérika xitay re'isi shi jinpinggha qattiqraq küch ishlitishi kérek”

Amérika dölet mejlisidiki her ikki partiye xitayning bésimini yoqitishqa munasiwetlik 10 türlük pilanda birlikke kelgen bolup, bu munasiwet bilen  amérika-xitay riqabiti alahide komitéti re'isi mayk galigér (Mike Gallager)  5-ayning 28-küni amérikaning dangliq taratquliridin “Foks” téliwiziyesining ziyaritini qobul qilip, xitayni peylidin yandurush üchün küch toplash we puxta teyyarliq qilish kéreklikini bildürgen.

Mayk galigér mundaq dégen: “Ukra'ina urushidin shuni bilduqki, zamaniwi urushta siz herbiy qoralliringizni nahayiti tézla ishlitip tügitisiz. Shunga biz herbiy rayonimizgha qoral-yaraq, oq-dorilirimizni kéchikmestin toplishimiz kérek. Buningghimu bir nechche yil waqit kétidu. Uningdin bashqa, biz ittipaqdashlirimiz bilen bash qoshup, ukra'ina urushining yaman aqiwitige qalmasliq üchün, küchlük diplomatiye we iqtisadiy chiqimgha munasiwetlik bir pilan tüzüshimiz kérek”.

Melumatlargha qarighanda, amérika hökümiti rusiye eskerlirini qoghlap chiqirish üchün küresh qiliwatqan ukra'ina armiyesige 75 milyard dollarliq herbiy we insanperwerlik yardimi bergen. Emma ukra'ina urushi uzaqqa sozulup ketse,  amérikaning yardimi bilen teng  herbiy küchimu xoraydiken, eger amérikaning qoral zapisi quruqdilip qalsa, xitay teywen'ge hujum qilghan teqdirde , uninggha taqabil turush teske toxtaydiken.

Mayk galigér teywen heqqide toxtilip mundaq dégen: “Biz 190 milyard dollarliq qoral sistémisini teyyarlap qoyduq, teywen uni sétiwaldi, emma biz téxi uni tapshurup bermiduq. Biz uni tapshurup bérishimiz hemde özimizde zapas saqlan'ghan bir yürüsh qorallarni chiqirip, ikki yil ichide teywen'ge bérishimiz kérek. Biz shi jinping bilen tilliship yürmey, uninggha qattiq küch ishlitishmiz kérek, bolmisa kéchikimiz we bu urushqa héch teyyarliqsizla kirip qalimiz”.

Mayk galigér amérikaning xitayni peylidin yandurushtiki axirqi meqsitining amérika bilen xitay otturisida yüz bérish éhtimalliqi bolghan teywen urushini toxtitish ikenlikini, gerche xitayni arqigha yandurush musheqqetlik bolsimu, urushning téximu dehshetlik we balayi apetlik bolidighanliqini bildürgen.