Америка билән хитай һөкүмити мәһбус алмаштурған

Америка билән хитайниң йиллардин бери давам қилип кәлгән дипломатик сүркилишлиридин кейин, икки дөләт өзара мәһбус алмаштурушқа қошулған. Нәтиҗидә, америка 3 хитай мәһбусни хитайға, хитай 3 америка пуқрасини америкаға қайтурған. Шундақла һәр икки дөләт бу адәмләрни хата һалда тутқанлиқини елан қилған.

“руйтерс агентлиқи” ниң 28-ноябир елан қилған хәвиридә ейтилишичә, бу қетимлиқ өзара мәһбус алмаштуруш келишими америка пирезиденти җов байден билән хитай компартийәси баш секретари ши җинпиң бу йил 11-айниң оттурисида перуда өткүзүлгән “асия-тинч окян иқтисадий һәмкарлиқ йиғини” да көрүшкәндин кейин әмәлгә ашқан. Америка 3 хитай пуқрасини қоюп бәргәндин башқа, йәнә хитайға қаратқан саяһәт агаһландурушиниң дәриҗисини төвәнләткән. Америка дөләт хәвпсизлики баянатчиси бу 3 америка пуқрасиниң хитай тәрипидин хата һалда тутқун қилинғанлиқини, пат йеқинда уларниң қоюп берилип, америкадики аилиси билән җәм болидиғанлиқини билдүргән.

Хитай һөкүмити тутқун қилған 3 америка пуқрасиниң бири 2016-йил җасуслуқ җинайити билән тутқун қилинған һаррисон ли; йәнә бири, зәһәр әткәсчилики билән шуғулланди дәп тутқун қилинип 12 йил түрмидә ятқан, 2019-йил өлүмгә һөкүм қилған марк сивидан; үчинчиси болса 2023-йил америка җасуси дәп әйиблинип өмүрлүк қамаққа һөкүм қилинған җон лиюң икән.

Хитай ташқи ишлар министирлиқи болса америка һөкүмити тәрипидин қанунсиз тутулған 3 хитай пуқрасиниң қоюп берилип, хитайға қайтурулидиғанлиқини билдүргән. Радийомиз хитай бөлүминиң хәвәр қилишичә, бу 3 хитай пуқраси хитай һөкүмитиниң парихорлуққа четилип қалған, нурғун пул билән америкаға қачқан әмәлдарлири болуши мумкин икән. Хитай һөкүмити бу арқилиқ парихор әмәлдарларға, нәгила қачсаң сени тутимиз дегән сигнални бәргән.

Хәвәр анализлириға қариғанда, хитайниң бу қетим 3 америка пуқрасини қайтурушқа мақул болуши, хитайға қаттиқ қол болуши билән тонулған доналд трамп һөкүмити билән яхши өтүш арзусиниң барлиқини ипадилиши дәп қаралмақтикән.