Хитайниң америка үчүн хәтәрлик рәқиб икәнлики тәкитләнмәктә

Бир қисим анализчилар изчил “дуняниң әң чоң әмгәк базири” дәп тәрипләп келиватқан хитайниң йәнә бир яқтин америка үчүн йошурун хәвпи ғайәт зор дәриҗидә ешиватқан рәқиб икәнлики йеқиндин буян қайта-қайта тәкитлинишкә башлиди. “ню-йорк вақти гезити” ниң 14-декабир санида дерек сиссор вә дәнийел бломентай имзасида елан қилинған мушу һәқтики мақалә әнә шу хил қарашларниң әң йеңиси һесаблиниду.

Апторлар америка “карханичилиқ институти” ниң алий тәтқиқатчилири болуп, уларниң қаришичә америка һөкүмити 2017-йилила хитайниң “ревизийонизимчи күч” икәнликини һәмдә бу күчниң хәлқара тәртипни өз мәнпәәтигә уйғун тәртиптә қайтидин қуруп чиқмақчи болуватқанлиқидин толуқ хәвәрдар болған. Йәнә келип хитайниң һәрбий кеңәймичилики, америкиниң тәсир даирисини аҗизлаштуруш урунушлири, америкиниң иттипақдиши болған канададин рәһимсизлик билән “қисас елиши” қатарлиқларму хитайниң ашу характерини ашкарилаватқан болсиму америка һөкүмити буниңға қандақ инкас қайтурушта бир қарарға келәлмигән.

Апторлар бирдәк тәкитлигән бир муһим нуқта америка бу хил һаләткә тақабил туруш үчүн хитай билән болған бир қисим иқтисадий мунасивәтни қисқартиши яки тәңшиши лазим. Шундақ қилғандила әқлий мүлүк оғрилиқиниң алдини алғили, хитай армийәсиниң җан томуриға зәрбә бәргили, шуниңдәк хитайдики инсан һәқлири дәпсәндичиликигә, болупму зор көләмлик назарәт механизмиға арилишип қалған ширкәтләрниң тизгинини тартқили болиду.

Уларниң пикричә, америкиниң хитайға қиливатқан експорти америкиниң миллий ишләпчиқириш омумий қиммитиниң бир пирсәнтигиму йәтмәйду, хитайдин қиливатқан импорт миқдари азийип кәтсә буниң орнини толдуралайдиған көплигән мәмликәтләр бу хил сода шерикликиниң орнини басалайду. Йәнә келип бу сода шериклири һечқачан америка үчүн хәтәр шәкилләндүрмәйду. Шуңа хитай билән болған сода мунасивитидә таможна беҗини тәтбиқлаш ақиланилик әмәс. Әксичә, хитай билән болған сода мунасивитини қайтидин тәңшәш вә қисқартиш зөрүр.