Amérika we xitay rehberliri kéler hepte alyaskada uchrishidiken

Amérika tashqi ishlar ministirliqi amérika we xitay rehberlirining kéler hepte alyaska shitatida uchrishidighanliqini jakarlidi.

Uchrishishqa amérika tashqi ishlar ministiri antoniy billinkén, dölet bixeterlik meslihetchisi jeyk sulliwan we xitay siyasiy byurosining ezasi yang jéchi, xitay tashqi ishlar minsitiri wang yi qatnishidiken.

Bu prézidént jow baydén bu yil yanwarda wezipige olturghandin buyan, ikki terep otturisidiki yuqiri derijilik rehberlerning tunji qétim biwaste körüshüshi bolup hésablinidiken.

Blumbérg xewerlirining bildürüshiche, xitay tashqi ishlar ministirliqi bu uchrishishning 18-19-mart künliri ötküzülidighanliqini, özlirining “Amérika terepning teklipige bina'en bu uchrishishiqa qatnishidighanliqini” éytqan.

Amérika bilen xitay otturisidiki munasiwetler korona wirusi yuqumi we shundaqla iqtisad, soda we Uyghurlargha yürgüzülüwatqan irqiy qirghinchiliq, xongkong démokratiyesining tehditke uchrishidek hel qilghuch mesililer tüpeyli nechche on yildin buyanqi eng töwen sewiyege chüshüp qalghanidi.

Shundaq bir mezgilde wezipe tapshuruwalghan baydén hökümitining xitay bilen ötküzüdighan tunji uchrishishi küchlük diqqet qozghimaqta.

Blumbérg géziti xewiride, amérika tashqi ishlar ministiri bilinkénning xitayning Uyghurlargha irqiy qirghinchiliq yürgüzgenlikini mu'eyyenleshtürgenlikini we shundaqla uning 10-mart küni amérika awam palatasi tashqi ishlar komitétidiki ispat anglash yighinida söz qilghanda “Biz xitaydiki kesipdashlirimizgha qiliwatqan bir qisim ishliri heqqidiki chongqur endishilirimizni, pikirlirimizni ochuq bayan qilip, bizning endishilirimizni hel qilidighan-qilalmaydighanliqini éniq aydinglashturimiz” dégenlikini qoshumche qilghan.

Nurghun közetküchiler kéler hepte ötküzülidighan bu uchrishishning amérikaning xitaygha qaritidighan siyasiti, Uyghurlarning irqiy qirghinchiliqqa uchrishi, xongkong mesilisi qatarliq hel qilghuch mesililerdiki pozitsiyesini namayen qilip béridighanliqini bildürüshmekte.