Америка-хитай килимат сөһбити ахирлашқан болсиму, бирақ тәрәпләр сөһбәт әһвали тоғрисида еғиз ачмиди

Мухбиримиз әркин
2021-04-19
Share

Америка президенти җов байденниң алаһидә һава килимати әлчиси, сабиқ америка ташқи ишлар министири җон кәррий хитайға қилған 2 күнлүк зияритини өткән шәнбә күни ахирлаштурған. Җон кәррий бу зияритидә хитайниң һава килимати әлчиси шйе җеңхуа билән сөһбәт елип барған. Сөһбәт ахирлашқиниға 2 күн болған болсиму, бирақ һәр икки тәрәп сөһбәтниң әһвали, музакирә қилинған мәсилиләр вә еришкән нәтиҗә тоғрисида һечқандақ учур берип бақмиди.

"җәнубий хитай сәһәр почтиси" гезитиниң хәвәр қилишичә, көзәткүчиләр вә муһитни қоғдиғучилар җон кәррийниң интайин аз нәтиҗә билән ахирлашқан зияритидин кейин америка билән хитайниң һава килимати саһәсидики һәмкарлиқ пурсити тарийиватқанлиқини агаһландурған. Җон кәррий америка-хитай мунасивити уйғур ирқий қирғинчилиқи, хоңкоң, тәйвән, җәнубий деңиз, хитайниң әқлий мүлк оғрилиқи қатарлиқ мәсилиләр түпәйли кәскинлишип кәткәндин бери байден һөкүмитиниң хитайни зиярәт қилған тунҗи юқири дәриҗилик әмәлдаридур.

Хитай һазирғичә ши җинпиңниң президент байденниң саһибханилиқидики "йәршари күни "тор йиғиниға қатнишидиған-қатнашмайдиғанлиқини билдүрмигән. "җәнубий хитай сәһәр почтиси" ниң ейтишичә, хитайниң муавин баш министири хән җең җон кәррий билән тор арқилиқ көрүшкәндә "хитайниң америка билән килимат мәсилисидики диалог вә һәмкарлиққа зор әһмийәт беридиғанлиқи" ни билдүргән болсиму, бирақ хитайниң муавин ташқи ишлар министири ле йүчең бирләшмә агентлиқиға хитайниң "һава килимати өзгиришигә башқилар тәләп қилғанлиқи үчүн әмәс, бәлки өзиниң тәшәббуси билән җаваб беридиғанлиқи" ни ейтқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт