Amérika hökümiti xitayning jinayitige shérik emeldarlar we shirketlerge qoyghan cheklimini kücheytken

30-Dékabir amérika tashqiy ishlar ministirliqi'ining torida élan qilin'ghan bir maqalide, amérika hökümitining xitayning jinayitige chétilidighan emeldarlar we shirketlerge qoyghan cheklimini kücheytkenliki heqqide melumat we mulahiziler bérilgen. Uningda bildürülüshiche, yéqinda amérika tashqiy ishlar ministiri mayk pompéyo xitay kompartiyesining jinayitige yardem bergen 60 shirket we teshkilatqa yéngi jaza tedbiri qollan'ghan. Amérika soda ministirliqining tizimlikidiki bu shirketler amérikadin téxnika oghrilash, xitaydiki kishilik hoquqni depsende qilishqa yardem bérish, xitay qoshunini zamaniwilashturushqa xizmet qilish yaki jenubiy déngizdiki döletlerge tehdit sélishqa chétishliq shirketler bolup, amérika hökümiti ularni bu jinayetlerdin tosush üchün heriketke ötken.

Bir amérika emeldarining bildürüshiche, xitay kompartiyesi démokratik döletlerning erkin muhiti we bezi boshluqidin paydilinip, soda mexpiyetlikini oghrilap xitay herbiylirige yardem bergen. Xitay karxaniliri xitay armiyesining jenubiy déngizdiki zamaniwilishish qurulushigha qatnashqan, bu xelq'ara prinsip we etraptiki döletlerning igilik hoquqigha xilapliq qilish hésablinidiken.

Amérika tashqiy ishlar ministiri mayk pompéyo yene diniy zatlar, az sanliq millet ezaliri, oxshimighan siyasiy köz qarashtiki kishiler, kishilik hoquqni qoghdighuchilar, muxbirlar we tinchliq bilen namayish qilghuchilarni basturghan xitay emeldarlirigha wiza cheklimisi qoyghanliqini élan qilghan bolup, bu emeldarlar amérikagha kirelmeydiken. Mayk pompéyoning bildürüshiche, amérika hökümiti her da'im ézilgüchi xelqning yénida turidighan hökümet bolup, mushundaq jaza tedbirliri arqiliq xitay hökümitini öz qilmishigha jawabkar bolushqa dawamliq qistaydiken.