Америка һөкүмити хитайниң җинайитигә шерик әмәлдарлар вә ширкәтләргә қойған чәклимини күчәйткән

30-Декабир америка ташқий ишлар министирлиқииниң торида елан қилинған бир мақалидә, америка һөкүмитиниң хитайниң җинайитигә четилидиған әмәлдарлар вә ширкәтләргә қойған чәклимини күчәйткәнлики һәққидә мәлумат вә мулаһизиләр берилгән. Униңда билдүрүлүшичә, йеқинда америка ташқий ишлар министири майк помпейо хитай компартийәсиниң җинайитигә ярдәм бәргән 60 ширкәт вә тәшкилатқа йеңи җаза тәдбири қолланған. Америка сода министирлиқиниң тизимликидики бу ширкәтләр америкадин техника оғрилаш, хитайдики кишилик һоқуқни дәпсәндә қилишқа ярдәм бериш, хитай қошунини заманивилаштурушқа хизмәт қилиш яки җәнубий деңиздики дөләтләргә тәһдит селишқа четишлиқ ширкәтләр болуп, америка һөкүмити уларни бу җинайәтләрдин тосуш үчүн һәрикәткә өткән.

Бир америка әмәлдариниң билдүрүшичә, хитай компартийәси демократик дөләтләрниң әркин муһити вә бәзи бошлуқидин пайдилинип, сода мәхпийәтликини оғрилап хитай һәрбийлиригә ярдәм бәргән. Хитай карханилири хитай армийәсиниң җәнубий деңиздики заманивилишиш қурулушиға қатнашқан, бу хәлқара принсип вә әтраптики дөләтләрниң игилик һоқуқиға хилаплиқ қилиш һесаблинидикән.

Америка ташқий ишлар министири майк помпейо йәнә диний затлар, аз санлиқ милләт әзалири, охшимиған сиясий көз қараштики кишиләр, кишилик һоқуқни қоғдиғучилар, мухбирлар вә тинчлиқ билән намайиш қилғучиларни бастурған хитай әмәлдарлириға виза чәклимиси қойғанлиқини елан қилған болуп, бу әмәлдарлар америкаға кирәлмәйдикән. Майк помпейониң билдүрүшичә, америка һөкүмити һәр даим езилгүчи хәлқниң йенида туридиған һөкүмәт болуп, мушундақ җаза тәдбирлири арқилиқ хитай һөкүмитини өз қилмишиға җавабкар болушқа давамлиқ қистайдикән.