Amérika xitay bilen rusiyening jasusluq tehditige qarshi yéngi istratégiye yolgha qoymaqchi bolghan

Amérika pirézidénti jow baydén 8-ayning 1-küni “Jasusluqqa qarshi dölet istratégiyesi” ni testiqlighan bolup, uningda rusiye, xitay, iran we shimaliy koréye qatarliq döletler “Balayi apetning béshi” dep qaralghan, rusiye bilen xitay bolsa amérikagha eng éghir jasusluq hujumi qiliwatqan dölet dep körsitilgen.

“Amérika awazi” torining bu heqte bergen xewiride éytilishiche, rusiye bilen xitay hetta bashqa döletlerni amérikagha qarshi bille jasusluq qilishqa dewet qilmaqta iken. Amérikaning jasusluqqa qarshi emeldarliri bu heqte mundaq dégen: “Bizning asasliq reqiblirimiz bizge qarshi hemkarliqini dawamliq kücheytip, bizge tehdit shekillendürdi. Xitay, rusiye we iranning jasusluq heriketliri téxi toluq bayqalghini yoq”.

“Jasusluqqa qarshi dölet istratégiyesi” de körsitilishiche, xitay bilen rusiyening köpligen shirketliri, jümlidin amérikadiki shirketliri yaki soda shérikliri öz tor betlirige yuqiri iqtidarliq tor hujumi qorallirini orunlashturghan. Aqiwette, amérika puqraliridin tartip dölet organlirighiche bu jasusluqning nishanigha we qurbanigha aylinish xewpi kücheygen.

Amérika istixbarat emeldarining bildürüshiche, reqib döletler xususiy shirketler arqiliq özlirining jasusluq qilmishlirini yoshurup kelmekte iken. Mesilen, rusiye xususiy shirketlerni amérikaning kelgüsidiki saylimigha arilishishqa chaqirghan. Uningdin bashqa xitaymu dölet ichidiki shirketliri, shundaqla ottura sherq we latin amérikasidiki shirketliri arqiliq yalghan, saxta teshwiqatlarni qanat yaydurup, saylamgha tesir körsitishke urunmaqta iken.

Xewerde körsitilishiche, amérikaning “Jasusluqqa qarshi dölet istratégiyesi” buningdin kéyin amérika istixbarat organlirining amérikagha qarshi künséri küchiyiwatqan jasusluq tehditige taqabil turushining yol xeritisi bolup qalidiken.