Пирезидент трамп хитай билән русийәниң йеқинлишип кетишини халимайдиғанлиқини ейтқан

Америка пирезиденти трамп хитай билән русийәниң қоюқ мунасивәттә болушидин еһтият қилидиғанлиқини билдүрүп, хәлқарада америкаға бирлишип қарши туруватқан бу икки дөләт билән мунасивәтни яхшилаш пилани барлиқини ейтқан. Пирезидент трамп 18-март русийә пирезиденти путин билән телефонда сөзлишип, украинада 30 күнлүк уруш тохтитишни музакирә қилишиниң арқисидин америка “фокис хәвәрлири” гә мундақ дегән: “бир тарих оқуғучиси болуш сүпитидә, мәнму һәммини көрдүм. Буниңдин өгинидиған тунҗи савақ, хитай билән русийәниң бирлишишини халимаслиқтур. ”

 Пирезидент трамп, москва билән бейҗиңниң икки тәрәплик мунасивитиниң асасиға гуман билән қарайдиғанлиқини билдүрүп, буниң “тәбиий әмәслики” ни ейтқан. Трамп мундақ дегән: “улар һазир өз ара дост болуши мумкин, әмма биз һәр иккиси билән дост өтимиз.”

Пирезидент трамп бу сөзләрни хитай русийәниң украинаға таҗавуз қилишини астиртин қоллап, униңға ярдәм бериш, шундақла йәнә икки дөләт хәлқаралиқ, район характерлик мәсилиләрдә бирлишивелиш, б д т хәвпсизлик кеңиши қатарлиқ хәлқара органларда бир-биригә янтаяқ болуп, б д т ниң паләч һалға чүшүп қелишини кәлтүрүп чиқириш билән әйиблиниватқан пәйттә ейтқан. Мәлум болушичә, трампниң русийәгә йеқинлишиши бәзи анализчилар тәрипидин сабиқ пирезидент никсонниң соғуқ уруши дәвридә хитай билән совет иттипақини айривәткинидәк москва билән бейҗиңни айриветишкә тиришиши, дәп қаралмақтикән. Хитай рәиси ши җинпиң 2022-йили русийә украинаға қораллиқ һуҗум қилиштин бир қанчә күн бурун, русийә-хитай һәмкарлиқиниң “чеки йоқлуқи” ни елан қилған. Пирезидент трамп сөзидә тәпсилий чүшәнчә бәрмигән болсиму, әмма “интайин начар енергийә сиясәтлири” ниң хитай билән русийәни бирләштүрүп қойғанлиқини ейтқан. Трамп мундақ дегән: “хитай сода җәһәттә бизгә интайин еһтияҗлиқ. Биз содидики қизил рәқәм пәрқини йоқитишимиз керәк. Шундақла русийә бизниң иқтисади күчимизниң бир қисмиға игә болушни ойлайду.”