Pirézidént tramp xitay bilen rusiyening yéqinliship kétishini xalimaydighanliqini éytqan

Amérika pirézidénti tramp xitay bilen rusiyening qoyuq munasiwette bolushidin éhtiyat qilidighanliqini bildürüp, xelq'arada amérikagha birliship qarshi turuwatqan bu ikki dölet bilen munasiwetni yaxshilash pilani barliqini éytqan. Pirézidént tramp 18-mart rusiye pirézidénti putin bilen téléfonda sözliship, ukra'inada 30 künlük urush toxtitishni muzakire qilishining arqisidin amérika “Fokis xewerliri” ge mundaq dégen: “Bir tarix oqughuchisi bolush süpitide, menmu hemmini kördüm. Buningdin öginidighan tunji sawaq, xitay bilen rusiyening birlishishini xalimasliqtur. ”

 Pirézidént tramp, moskwa bilen béyjingning ikki tereplik munasiwitining asasigha guman bilen qaraydighanliqini bildürüp, buning “Tebi'iy emesliki” ni éytqan. Tramp mundaq dégen: “Ular hazir öz ara dost bolushi mumkin, emma biz her ikkisi bilen dost ötimiz.”

Pirézidént tramp bu sözlerni xitay rusiyening ukra'inagha tajawuz qilishini astirtin qollap, uninggha yardem bérish, shundaqla yene ikki dölet xelq'araliq, rayon xaraktérlik mesililerde birlishiwélish, b d t xewpsizlik kéngishi qatarliq xelq'ara organlarda bir-birige yantayaq bolup, b d t ning palech halgha chüshüp qélishini keltürüp chiqirish bilen eyibliniwatqan peytte éytqan. Melum bolushiche, trampning rusiyege yéqinlishishi bezi analizchilar teripidin sabiq pirézidént niksonning soghuq urushi dewride xitay bilen sowét ittipaqini ayriwetkinidek moskwa bilen béyjingni ayriwétishke tirishishi, dep qaralmaqtiken. Xitay re'isi shi jinping 2022-yili rusiye ukra'inagha qoralliq hujum qilishtin bir qanche kün burun, rusiye-xitay hemkarliqining “Chéki yoqluqi” ni élan qilghan. Pirézidént tramp sözide tepsiliy chüshenche bermigen bolsimu, emma “Intayin nachar énérgiye siyasetliri” ning xitay bilen rusiyeni birleshtürüp qoyghanliqini éytqan. Tramp mundaq dégen: “Xitay soda jehette bizge intayin éhtiyajliq. Biz sodidiki qizil reqem perqini yoqitishimiz kérek. Shundaqla rusiye bizning iqtisadi küchimizning bir qismigha ige bolushni oylaydu.”