Béyjingda ötküzülgen amérika-xitay soda söhbiti "Normal ötken"

Muxbirimiz erkin
2019-01-09
Élxet
Pikir
Share
Print

7-Yanwar béyjingda bashlan'ghan amérika-xitay soda söhbiti charshenbe küni axirlashti. Söhbetning 2 kün ötküzülüshi pilanlan'ghan bolsimu, lékin söhbet pilandin uzun dawamlashqan.

Roytérs agéntliqining xewer qilishiche, terepler söhbetning tepsilati pat arida élan qilinidighanliqini bildürgen. Amérika emeldarliri söhbetning "Normal ötkenliki" ni bildürsimu, lékin dunyaning diqqiti söhbetning qandaq netije bilen axirlashqanliqigha tikilmekte.

Amérika soda söhbet ömiki ötken düshenbe küni béyjinggha yétip bérip, xitay bilen 2 künlük söhbetni bashlighan. Amérika prézidénti donald tramp bilen xitay re'isi shi jinping ötken yili 1‏-dékabir küni argéntinada uchriship, soda urushining 90 kün toxtitilghanliqini élan qilghan idi. Düshenbe küni béyjingda bashlan'ghan söhbet ikki terepning soda urushi toxtighandin béri ötküzgen tunji söhbiti bolup hésablinidu.

Rotérsning xewiride qeyt qilishiche, esli söhbet 2 künlük pilanlan'ghan bolsimu, lékin 3 kün'ge sozulghan. Amérika söhbet ömikining ezasi, soda we tashqi yéza-igilik ishlirigha mes'ul yardemchi tashqi ishlar ministiri ted mikkinéy muxbirlargha "Söhbetning normal ötkenliki", xitay sepirining "Biz üchün yaxshi bolghanliqi" ni bildürgen.

Prézidént tramp seyshenbe küni twéttirda élan qilghan bayanida söhbetni "Nahayiti yaxshi ötüwatidu" dégen idi. Lékin xitay tashqi ishlar ministirliqining bayanatchisi lu kang charshenbe küni söhbetning axirlashqanliqini delilligen, lékin söhbetning netijisi heqqide pikir bayan qilishni ret qilip, uning netijisining pat arida élan qilinidighanliqini bildürgen. Roytérsning xewiride tekitlinishiche, xitay tashqi ishlar ministirliqining bayanatchisi lu kang "Eger u netijilik axirlashsa, bu amérika we xitay üchün paydiliq bolupla qalmay, dunya iqtisadi üchünmu paydiliq xewer bolidu" dégen.

Prézidént tramp ötken yili dékabirda shi jinping bilen körüshkende xitayning 90 kün ichide amérika bilen söhbet ötküzüp, xitayning iqtisadi qurulmisidiki adaletsiz riqabetke seweb boluwatqan bezi halqilarni islah qilish, amérika shirketlirini téxnika ötküzüp bérishke mejburlimasliq qatarliq mesililerde kélishim hasil qilishini telep qilghan. Prézidént tramp eger bu 90 kün ichide kélishim hasil qilinmisa, xitay éksport mehsulatlirigha qoyulidighan 10 pirsent bajni 25 pirsentke chiqiridighanliqni bildürgen idi.

Toluq bet