Америка-хитай арисидики биринчи басқучлуқ «сода келишими» имзаланди

Мухбиримиз ирадә
2020-01-16
Елхәт
Пикир
Share
Принт

15-январ күни ақсарайда америка-хитай арисидики биринчи басқучлуқ «сода келишими» имзаланди.

CNN Телевизийәсиниң бу һәқтики хәвиригә қариғанда, биринчи басқучлуқ келишимгә асасән хитай америкадин кейинки икки йил ичидә йәнә 200 милярд доллар қиммитидә тавар мал вә мулазимәт сетивалидикән. Експорт қилинидиған малларниң мутләқ көп қисмини йеза-игилик мәһсулатлири тәшкил қилидикән.

Америка тәрәп болса хитайниң 120 милярд доллар қиммитидики маллириға қоюлған әслидики 15 пирсәнтлик баҗни 7 йерим пирсәнткә чүшүрүшкә қошулған.

Әгәр бу келишим һәқиқәтән әмәлийләшкән тәқдирдә американиң хитайға қаратқан експорт соммиси әслидики 185 милярд доллардин һалқип, 2020-йили 260 милярд доллар, 2021-йили болса 310 милярд долларға йетидикән.

Бу қетимлиқ келишимдә йәнә америка ширкәтлириниң әқлий мүлүк һоқуқини қоғдашқа мунасивәтлик муһим маддиларму киргүзүлгән икән. Әмма хитайниң дөләт игидарчилиқидики карханиларни қоллаш арқилиқ адаләтсиз риқабәткә йол ечишқа мунасивәтлик мәсилиләр техи тилға елинмиған.

«Вол-ситрит журнили» гезити бу һәқтики хәвиридә «биринчи басқучлуқ келишим» ни америка президенти доналд трампниң ғәлибиси дәп қарашқа болидиғанлиқини, чүнки бу келишимдә америкаға пайдилиқ амиллар көплүкини билдүргән. Хәвәрдә йәнә әмма хитайниң америкаға вәдә қилған бу малларни сетивелиш иқтидари бар-йоқлуқи вә келишимдә бәлгиләнгән маддиларға хитайниң әмәл қилиш яки қилмаслиқиниң мутәхәссиләр тәрипидин инчиклик билән көзитилишиниң зөрүрлүкини тәкитлигән.

Пикирләр (0)
Share
Толуқ бәт