Xitayning amérika bilen “Da'imliq normal soda munasiwiti qilish” salahiyitini bikar qilidighan qanun layihesi tonushturuldi

Amérika dölet mejlisi qarmiqidiki xitay ishliri pewqul'adde komitéti re'isi jon molénar we awam palata ezasi tom su'ozi xitayning amérika bilen “Da'imliq normal soda munasiwiti” salahiyitini bikar qilishni meqset qilghan bir qanun layihesini tonushturghan.

“Adil sodini eslige keltürüsh qanuni” dep atalghan bu qanun layihesi her ikki partiye ezalirining qollishi bilen otturigha chiqqan bolup, bu qanun layihesi pirézidént tramp teripidin bérilgen memuriy buyruqqa asasen qaytidin tonushturulghan.

Xitay ishliri pewqul'adde komitéti 23-yanwar küni élan qilghan bayanatta déyilishiche, 2000-yili xitay dunya soda teshkilatigha kirishke teyyarliq qiliwatqanda, amérika dölet mejlisi bélet tashlap, xitaygha “Da'imliq normal soda munasiwiti” salahiyiti bérishni qarar qilghan, ular bu arqiliq xitayning iqtisadini yaxshilap, siyasiy tüzülmisining démokratiyelishishini ümid qilghan. Halbuki, bu salahiyet xitayning dölet igilikidiki iqtisadining étibargha érishishi we kommunizm dölitide ishlepchiqirilghan mehsulatlarning türkümlep amérika bazirigha kirishige yol achqan. Shuningdin kéyinki 20 yilda, amérikada ishlepchiqirish sana'iti weyranchiliqqa uchrighan, amérika shirketlirining bilim mülük hoquqi oghrilan'ghan, xitay kompartiyesi bolsa amérikaning bash reqibige aylan'ghan.

Komitét re'isi jon molénar bayanattiki sözide mundaq dégen:

“Adil sodini eslige keltürüsh qanuni xitay kompartiyesining adaletsiz iqtisadiy pa'aliyetlirini tügitishtiki halqiliq bir qedem. Bu qanun amérikaning dölet bixeterlikini qoghdaydu, teminlesh zenjirining sijilliqini ashuridu hemde ishlepchiqirishni amérika we ittipaqdash döletlerge qayturup kélidu.”

Awam palata ezasi tom suzi bolsa “Bu qanun layihesi arqiliq xitay kompartiyesige éniq signal bérilgenlikini, uning emdi étibargha ériship, heqsiz soda qilalmaydighanliqini, amérikaliqlarning eqliy mülüklirini oghriliyalmaydighanliqini hemde Uyghurlarning mejburiy emgiki bedilige yasalghan tawarlirini amérika teminlesh zenjirlirige kirgüzelmeydighanliqini” tekitligen.

Melum bolushiche, bu qanun layihesining kéngesh palata nusxisi oxshash künde, kéngesh palata ezaliri tom köttin we jim bankis teripidin tonushturulghan.